Qazaqstanda gaz kondensatyn eseptemegende, qyrkúiekte munai óndirý táýligine 1,851 million barrelge jetti. Tamyzda bul kórsetkish 1,830 million barrel bolǵan edi. Bul týraly OPEK-tiń ai saiynǵy esebinde jazylǵan, dep habarlaidy dalanews.kz.
OPEK+ kelisimi aiasynda Qazaqstanǵa qyrkúiekte táýligine 1,628 million barrel munai óndirýge ruqsat etilgen. Bul kólem 2026 jylǵy qazan men qarashada da ózgerissiz qalady.
OPEK+ elderi biyl jyldyń basym bóliginde munai óndirý kvotalaryn ai saiyn arttyryp otyrdy. Alaida josparlanǵan ósimniń kóbi is júzinde júzege aspady. Buǵan Iran men Ýkrainadaǵy áskeri qaqtyǵystardyń Parsy shyǵanaǵy elderinen, Reseiden jáne Qazaqstannan munai eksporttaýǵa kedergi keltirýi sebep bolǵan.
"Teńizshevroil" kompaniiasy 2025 jyly Teńiz ken ornyndaǵy bolashaq keńeitý jobasyn aiaqtaǵannan keiin Qazaqstanda munai óndirý kólemi OPEK+ kelisiminde belgilengen shekten asyp ketti.
Derekkóz málimetinshe, Qazaqstanda munai men gaz kondensatyn óndirý kólemi qyrkúiekte 7,65 million tonnaǵa (táýligine 1,92 million barrel) deiin tómendegen. Tamyzda bul kórsetkish 8,48 million tonna (táýligine 2,06 million barrel) bolǵan.
Aita keteiik, 7 qyrkúiek pen 1 qazan aralyǵynda Qarashyǵanaq ken ornynda josparly jóndeý jumystary júrgizildi. Bul ken ornyndaǵy shikizat óndirý kólemi OPEK kelisimi boiynsha esepke alynbaidy.
