بۇل تۋرالى جارما اۋدانى اكىمى احمەتقالي نۇرعوجين الەۋمەتتىك-ەكونوميكالىق دامۋى تۋرالى ەسەبىندە مالىمدەدى.
- اۋداندا الەمدىك پاندەمياعا بايلانىستى قيىندىقتارعا قاراماستان، سوڭعى ءۇش جىلدا ونەركاسىپ ونىمدەرىن ءوندىرۋ 29 ەسە ءوستى. اتالمىشش سالا بويىنشا اۋدانىمىز وبلىستا وسكەمەن قالاسىنان كەيىنگى ەكىنشى ورىندى الادى. ايتا كەتەيىك، حالىقتى الەۋمەتتىك قورعاۋ سالاسىندا 2020 جىلى 1315 جاڭا جۇمىس ورنى اشىلدى. اۋدان حالقىنىڭ 96% تازا اۋىز سۋمەن قامتاماسىز ەتىلدى. 15 ءبىلىم بەرۋ ۇيىمىندا جەرگىلىكتى بيۋدجەت قاراجاتى ەسەبىنەن بەينەباقىلاۋ كامەرالارى ورناتىلدى. 12 مەكتەپتە بالالاردىڭ قاۋىپسىزدىگى مەن قولايلىلىعى ءۇشىن عيمارات ىشىندە سانيتارلىق جەلى جۇرگىزىلدى، – دەدى اۋدان اكىمى.
جارما اۋدانى اكىمىنىڭ ايتۋىنشا، كىشى قاراسۋ اۋىلىندا سۋ قۇبىرىن سالۋ جانە سۇلۋسارى مەن جارىق اۋىلدارىن تازا اۋىز سۋمەن قامتاماسىز ەتۋ جۇمىستارى اياقتالادى. سونداي – اق، "اۋىل-ەل بەسىگى" باعدارلاماسى اياسىندا بيىل اۋەزوۆ كەنتىندەگى مادەنيەت ءۇيى پايدالانۋعا بەرىلىپ، سۋىقبۇلاق كەنتىندەگى اۋىلدىق كلۋبقا كۇردەلى جوندەۋ جۇمىستارى جۇرگىزىلەدى.
ايتا كەتۋ كەرەك، بيىل بۇرىنعى اۋدان ورتالىعى – شار قالاسىنىڭ ينفراقۇرىلىمىن اباتتاندىرۋ جانە قايتا جاڭارتۋ بويىنشا كەشەندى جوسپار ازىرلەنەدى.
– وبلىستا بۇرىنعى اۋدان ورتالىقتارىن دامىتۋعا ەرەكشە نازار اۋدارىلعان. ەلدى مەكەندەردە الەۋمەتتىك ينفراقۇرىلىم ساقتالعان، حالىق ورتا جانە مەكتەپكە دەيىنگى ءبىلىم بەرۋ، دەنساۋلىق ساقتاۋ، مادەنيەت جانە سپورت قىزمەتتەرىمەن قامتاماسىز ەتىلگەن. دەسە دە، تۇرعىن ۇي-كوممۋنالدىق سالادا جانە جول ينفراقۇرىلىمىندا ءبىرقاتار ماسەلەلەر بار. ونى شەشۋ ءۇشىن بۇرىنعى اۋدان ورتالىقتارىن دامىتۋ باعدارلاماسى ازىرلەنەدى. مەملەكەت باسشىسى قاسىم-جومارت توقايەۆتىڭ "ۇلتتىق ەكونوميكانىڭ ۇدەمەلى ءوسۋىنسىز ازاماتتاردىڭ ءال-اۋقاتىن قامتاماسىز ەتۋ مۇمكىن ەمەس» مىندەتىنە سۇيەنە وتىرىپ، ناقتى سەكتوردىڭ باسەكەلەستىك ارتىقشىلىقتارىن كۇشەيتۋ ءۇشىن جۇمىس ىستەپ جاتىرمىز، – دەدى شقو اكىمى دانيال احمەتوۆ.
ايتا كەتۋ كەرەك، وتكەن جىلى شار قالاسىندا كوپتەن كۇتكەن سپورت كەشەنى پايدالانۋعا بەرىلدى. جالپى اۋداندا جىل قورىتىندىسى بويىنشا 48 كوپبالالى وتباسى تۇرعىن ۇيمەن قامتاماسىز ەتىلسە، 2 پاتەرلى ءتورت تۇرعىن ءۇي مەديسينا قىزمەتكەرلەرىنە بەرىلدى.
- اۋدانىمىزدا دارىگەرلەرگە بارىنشا قولداۋ كورسەتىلىپ جاتىر. جاڭا جىل قارساڭىندا جاڭا پاتەرلەر سىيلاعاندارىڭىز ءۇشىن بارلىق ارىپتەستەرىمنىڭ اتىنان العىس بىلدىرەمىن. ءوز تاراپىمىزدان حالىق دەنساۋلىعى ءۇشىن ايانباي ەڭبەك ەتەتىن بولامىز، - دەدى اۋداندىق اۋرۋحانا قىزمەتكەرى جانە كوپبالالى انا مەرۋەرت جادىقوۆا.
