Saiasattanýshy Ǵaziz Ábishev Densaýlyq saqtaý ministrliginiń farmatsiia komitetiniń eks-tóraiymy Larisa Pak isine qatysty pikir bildirdi, dep habarlaidy Dalanews.kz.
“Úsh jyl buryn qoǵamdy dúr silkindirgen atyshýly istiń jańǵyryǵy áli basylǵan joq. Áńgime – 2017 jyly sybailas jemqorlyqqa qarsy Ulttyq biýro qyzmetkerleri ustaǵan, Densaýlyq saqtaý ministrligi Farmatsiia komiteti tóraǵasynyń mindetin atqarýshy Larisa Pak jaiynda. Sol kezde tergeýshiler ony “júieli túrde para aldy” dep aiyptaǵan. Alaida kóp uzamai bul tergeý azaptaýǵa ulasyp, Larisa Pak insýlt aldy. Osydan keiin ony úiqamaqqa jibergenimen, tergeýge shaqyrýlar jalǵasyp, 2019 jyly Larisa Pak ómirden ótti. Al 2020 jyly marqum “qylmys quramy bolmaǵandyqtan” tolyq aqtalyp shyqty”, – deidi saiasattanýshy.
Osy oqiǵadan keiin, 2022 jyly Sybailas jemqorlyqqa qarsy qyzmettiń burynǵy tergeýshilerine qatysty qylmystyq is qozǵaldy. Degenmen ol kezde naqty bir tulǵalar jaýapkershilikke tartylǵan joq.
“Al biyl, iaǵni 2025 jyldyń jazynda, sol atyshýly is qaita jandandy. 2017 jyly Jemqorlyqqa qarsy Ulttyq biýrony basqarǵan Talǵat Tatýbaev “azaptaý ádisterin qoldandy” degen kúdikpen ustaldy. Sonymen qatar osy biýronyń tergeý departamenti basshysynyń burynǵy orynbasary, aty kópshilikke málim Olesia Keksel de osy is boiynsha kúdikti retinde tanyldy”, — deidi ol.
Qazirgi tańda qoǵam bul istiń ádil sheshilýin kútip otyr. Buǵan deiin Antikor jeke vedomstvo retindegi mártebesinen aiyrylyp, onyń ornyna arnaiy qyzmet generaly basqaratyn jańa qurylym kelgen edi. Osy ózgeristen keiin burynǵy tergeýshilerdiń qyzmetine qatysty keshendi tekseris bastalǵan.
“Mundai tekseristerge burynǵy biýronyń tolyq joiylyp úlgermegen qujattarynyń jańa basshylyqtyń qolyna ótýi sebep bolyp otyr. Tergeýshilerdiń kúmándi ádisterine qarsy shaǵymdanǵandar, sondai-aq osy salada kóp jyl qyzmet etken ári jańa tekseristen ótken eski kadrlar da tolyq kartinany qalpyna keltirýge kómektespek. Qalai bolǵanda da, endigi jerde qoǵam ádiletsiz tergeý men zańsyz áreketterdi áshkereleýge jol ashylatynyna úmitti”, — dep qosty ol.
Eske salaiyq, 2019 jyly Densaýlyq saqtaý ministrliginiń farmatsiia komitetiniń eks-tóraiymy Larisa Pak qaitys boldy.
