ساياساتتانۋشى عازيز ابىشيەۆ دەنساۋلىق ساقتاۋ مينيسترلىگىنىڭ فارماسيا كوميتەتىنىڭ ەكس-تورايىمى لاريسا پاك ىسىنە قاتىستى پىكىر ءبىلدىردى، دەپ حابارلايدى Dalanews.kz.

“ءۇش جىل بۇرىن قوعامدى ءدۇر سىلكىندىرگەن اتىشۋلى ءىستىڭ جاڭعىرىعى ءالى باسىلعان جوق. اڭگىمە – 2017 جىلى سىبايلاس جەمقورلىققا قارسى ۇلتتىق بيۋرو قىزمەتكەرلەرى ۇستاعان، دەنساۋلىق ساقتاۋ مينيسترلىگى فارماسيا كوميتەتى ءتوراعاسىنىڭ مىندەتىن اتقارۋشى لاريسا پاك جايىندا. سول كەزدە تەرگەۋشىلەر ونى “جۇيەلى تۇردە پارا الدى” دەپ ايىپتاعان. الايدا كوپ ۇزاماي بۇل تەرگەۋ ازاپتاۋعا ۇلاسىپ، لاريسا پاك ينسۋلت الدى. وسىدان كەيىن ونى ءۇيقاماققا جىبەرگەنىمەن، تەرگەۋگە شاقىرۋلار جالعاسىپ، 2019 جىلى لاريسا پاك ومىردەن ءوتتى. ال 2020 جىلى مارقۇم “قىلمىس قۇرامى بولماعاندىقتان” تولىق اقتالىپ شىقتى”، – دەيدى ساياساتتانۋشى.

وسى وقيعادان كەيىن، 2022 جىلى سىبايلاس جەمقورلىققا قارسى قىزمەتتىڭ بۇرىنعى تەرگەۋشىلەرىنە قاتىستى قىلمىستىق ءىس قوزعالدى. دەگەنمەن ول كەزدە ناقتى ءبىر تۇلعالار جاۋاپكەرشىلىككە تارتىلعان جوق.

“ال بيىل، ياعني 2025 جىلدىڭ جازىندا، سول اتىشۋلى ءىس قايتا جانداندى. 2017 جىلى جەمقورلىققا قارسى ۇلتتىق بيۋرونى باسقارعان تالعات تاتۋبايەۆ “ازاپتاۋ ادىستەرىن قولداندى” دەگەن كۇدىكپەن ۇستالدى. سونىمەن قاتار وسى بيۋرونىڭ تەرگەۋ دەپارتامەنتى باسشىسىنىڭ بۇرىنعى ورىنباسارى، اتى كوپشىلىككە ءمالىم ولەسيا كەكسەل دە وسى ءىس بويىنشا كۇدىكتى رەتىندە تانىلدى”، — دەيدى ول.

قازىرگى تاڭدا قوعام بۇل ءىستىڭ ءادىل شەشىلۋىن كۇتىپ وتىر. بۇعان دەيىن انتيكور جەكە ۆەدومستۆو رەتىندەگى مارتەبەسىنەن ايىرىلىپ، ونىڭ ورنىنا ارنايى قىزمەت گەنەرالى باسقاراتىن جاڭا قۇرىلىم كەلگەن ەدى. وسى وزگەرىستەن كەيىن بۇرىنعى تەرگەۋشىلەردىڭ قىزمەتىنە قاتىستى كەشەندى تەكسەرىس باستالعان.

“مۇنداي تەكسەرىستەرگە بۇرىنعى بيۋرونىڭ تولىق جويىلىپ ۇلگەرمەگەن قۇجاتتارىنىڭ جاڭا باسشىلىقتىڭ قولىنا ءوتۋى سەبەپ بولىپ وتىر. تەرگەۋشىلەردىڭ كۇماندى ادىستەرىنە قارسى شاعىمدانعاندار، سونداي-اق وسى سالادا كوپ جىل قىزمەت ەتكەن ءارى جاڭا تەكسەرىستەن وتكەن ەسكى كادرلار دا تولىق كارتينانى قالپىنا كەلتىرۋگە كومەكتەسپەك. قالاي بولعاندا دا، ەندىگى جەردە قوعام ادىلەتسىز تەرگەۋ مەن زاڭسىز ارەكەتتەردى اشكەرەلەۋگە جول اشىلاتىنىنا ءۇمىتتى”، — دەپ قوستى ول.

ەسكە سالايىق، 2019 جىلى دەنساۋلىق ساقتاۋ مينيسترلىگىنىڭ فارماسيا كوميتەتىنىڭ ەكس-تورايىمى لاريسا پاك قايتىس بولدى.