Atyraý oblystyq máslihatynyń depýtaty Aibar Erekeshov burynǵy jubaiynyń turmystyq zorlyq jónindegi aiyptaýlaryn joqqa shyǵardy, dep habarlaidy Dalanews.kz.
Orda.kz tilshisiniń habarlaýynsha, Atyraý oblystyq máslihatynyń depýtaty Aibar Erekeshov burynǵy áieli Nurjamal Tajǵalievanyń “kóp jyldyq turmystyq zorlyq-zombylyq boldy” degen aiyptaýlaryna túsinikteme berdi. Ol burynǵy jubaiynyń aitqandarynyń bárin “jalǵan jáne jala” dep atap, eshqashan qol kótermegenin málimdedi.
Depýtattyń aitýynsha, Nurjamaldyń jaraqattary múlde basqa jaǵdailarǵa bailanysty bolǵan.
“Ol 2018 jyly basynan jaraqat alyp, aýrýhanaǵa túsken. Biraq bul oqiǵa onyń úige mas kúiinde kelip, taiyp jyǵylýynan bastaldy. Keiin avtomobil apatyna ushyrap, taǵy jaraqattandy. Sol kezde biz bólek turyp jatqan edik”, – dedi Erekeshov.
Sonymen qatar depýtat “názik janǵa qol kótergen emespin” dep, fizikalyq kúsh kórsetý faktisin tolyq joqqa shyǵardy.
“Ekeýmiz birge bolǵan kezde jalǵyz ret aralasqan jaǵdaiymyz bar. Ol kezde men úlken qyzymyz ekeýiniń arasyndaǵy janjaldy toqtatpaq boldym. Basqa eshqandai kúsh kórsetý áreketi bolmady, ony dáleldeý ońai. Politsiia shaqyryldy degen resmi derekter de joq”, – dep naqtylady ol.
Erekeshovtyń sózinshe, resmi ajyrasý 2023 jyly bolǵan. Biraq onyń bastamashysy Nurjamaldyń ózi bolǵanyn aitty.
“2018 jyly bastalǵan janjaldy qoia turyp, 2023 jyly men de ajyrasýǵa aryz jazdym. Oǵan deiin Nurjamal bir aiǵa Eýropaǵa ketip, emshektegi balany tastap ketti. Sodan keiin ajyrasýǵa bel býdym. Onyń talabymen men oǵan eki páter men bir avtokólik qaldyrdym. Sol kezde ol ‘maǵan aliment qajet emes’ dep málimdedi”.
Degenmen, 2024 jyldyń jeltoqsanynda eks-jubaiy oiynan ainyp, aliment talap ete bastaǵan.
“Ol is boiynsha sot oryndaýshysy esep júrgizdi. Men qańtardan bastap tóleýge kirisetinimdi aittym. Eshqashan mindetimdi oryndaýdan jaltarǵan emespin”, – dep atap ótti depýtat.
Depýtat balalardyń anasymen qalǵanyn, alaida ózi de turaqty túrde aralasyp, kómektesip turǵanyn jetkizdi. 2024 jyldyń qarashasynda burynǵy jubaiy taǵy da úiinen ketip qalǵanyn aityp otyr.
“Ol tórt balany 17 jastaǵy qyzǵa qaldyryp, Almatyǵa ketti. Osydan keiin úlken qyzym anasyna oralýdan múlde bas tartty. Ekinshi balamyzdyń densaýlyǵynda ereksheligi bar, oǵan erekshe kútim kerek”, – dedi Erekeshov.
Nurjamal Tajǵalieva “otbasynda zorlyq-zombylyq jasaǵan adam depýtattyq laýazym ielenýge tiis emes” degen pikirin ashyq aitqan. Al Aibar Erekeshov bolsa, eger qol kóterý faktisi ras bolsa, quqyq qorǵaý organdary tarapynan jazba-esepter bolýy tiis edi degen ýájin alǵa tartady.
“Eger men shynymen qol kótergen bolsam, politsiia shaqyrylǵan, hattama toltyrylǵan bolar edi. Eshqashan mundai jaǵdai oryn alǵan joq. Muny tekserý qiyn emes”, – dedi ol.
Depýtattyń málimdeýinshe, onyń negizgi maqsaty — balalardyń jaǵdaiyn qamtamasyz etip, otbasy músheleriniń turaqtylyǵyn saqtaý.
“Ajyrasý – óz aldyna aýyr taqyryp. Balalar da zardap shekpeýi kerek. Men eshqashan zańdy buzǵan emespin, sondyqtan óz atymdy ári abyroiymdy qorǵaý úshin barymdy salamyn”, – dep túiindedi Erekeshov.
Depýtattyń jaýabynan soń máseleniń naqty baǵasyn quqyq qorǵaý organdary men sot anyqtamaq. Eki jaqtyń da usynǵan dálelderi tekseriledi, resmi qorytyndy sonyń negizinde shyǵarylady. Endeshe, bul is boiynsha túpkilikti sheshimdi alda kútýge týra keledi.
