اتىراۋ وبلىستىق ءماسليحاتىنىڭ دەپۋتاتى ايبار ەرەكەشوۆ بۇرىنعى جۇبايىنىڭ تۇرمىستىق زورلىق جونىندەگى ايىپتاۋلارىن جوققا شىعاردى، دەپ حابارلايدى Dalanews.kz.
Orda.kz ءتىلشىسىنىڭ حابارلاۋىنشا، اتىراۋ وبلىستىق ءماسليحاتىنىڭ دەپۋتاتى ايبار ەرەكەشوۆ بۇرىنعى ايەلى نۇرجامال تاجعالييەۆانىڭ “كوپ جىلدىق تۇرمىستىق زورلىق-زومبىلىق بولدى” دەگەن ايىپتاۋلارىنا تۇسىنىكتەمە بەردى. ول بۇرىنعى جۇبايىنىڭ ايتقاندارىنىڭ ءبارىن “جالعان جانە جالا” دەپ اتاپ، ەشقاشان قول كوتەرمەگەنىن مالىمدەدى.
دەپۋتاتتىڭ ايتۋىنشا، نۇرجامالدىڭ جاراقاتتارى مۇلدە باسقا جاعدايلارعا بايلانىستى بولعان.
“ول 2018 جىلى باسىنان جاراقات الىپ، اۋرۋحاناعا تۇسكەن. ءبىراق بۇل وقيعا ونىڭ ۇيگە ماس كۇيىندە كەلىپ، تايىپ جىعىلۋىنان باستالدى. كەيىن اۆتوموبيل اپاتىنا ۇشىراپ، تاعى جاراقاتتاندى. سول كەزدە ءبىز بولەك تۇرىپ جاتقان ەدىك”، – دەدى ەرەكەشوۆ.
سونىمەن قاتار دەپۋتات “نازىك جانعا قول كوتەرگەن ەمەسپىن” دەپ، فيزيكالىق كۇش كورسەتۋ فاكتىسىن تولىق جوققا شىعاردى.
“ەكەۋمىز بىرگە بولعان كەزدە جالعىز رەت ارالاسقان جاعدايىمىز بار. ول كەزدە مەن ۇلكەن قىزىمىز ەكەۋىنىڭ اراسىنداعى جانجالدى توقتاتپاق بولدىم. باسقا ەشقانداي كۇش كورسەتۋ ارەكەتى بولمادى، ونى دالەلدەۋ وڭاي. پوليسيا شاقىرىلدى دەگەن رەسمي دەرەكتەر دە جوق”، – دەپ ناقتىلادى ول.
ەرەكەشوۆتىڭ سوزىنشە، رەسمي اجىراسۋ 2023 جىلى بولعان. ءبىراق ونىڭ باستاماشىسى نۇرجامالدىڭ ءوزى بولعانىن ايتتى.
“2018 جىلى باستالعان جانجالدى قويا تۇرىپ، 2023 جىلى مەن دە اجىراسۋعا ارىز جازدىم. وعان دەيىن نۇرجامال ءبىر ايعا ەۋروپاعا كەتىپ، ەمشەكتەگى بالانى تاستاپ كەتتى. سودان كەيىن اجىراسۋعا بەل بۋدىم. ونىڭ تالابىمەن مەن وعان ەكى پاتەر مەن ءبىر اۆتوكولىك قالدىردىم. سول كەزدە ول ‘ماعان اليمەنت قاجەت ەمەس’ دەپ مالىمدەدى”.
دەگەنمەن، 2024 جىلدىڭ جەلتوقسانىندا ەكس-جۇبايى ويىنان اينىپ، اليمەنت تالاپ ەتە باستاعان.
“ول ءىس بويىنشا سوت ورىنداۋشىسى ەسەپ جۇرگىزدى. مەن قاڭتاردان باستاپ تولەۋگە كىرىسەتىنىمدى ايتتىم. ەشقاشان مىندەتىمدى ورىنداۋدان جالتارعان ەمەسپىن”، – دەپ اتاپ ءوتتى دەپۋتات.
دەپۋتات بالالاردىڭ اناسىمەن قالعانىن، الايدا ءوزى دە تۇراقتى تۇردە ارالاسىپ، كومەكتەسىپ تۇرعانىن جەتكىزدى. 2024 جىلدىڭ قاراشاسىندا بۇرىنعى جۇبايى تاعى دا ۇيىنەن كەتىپ قالعانىن ايتىپ وتىر.
“ول ءتورت بالانى 17 جاستاعى قىزعا قالدىرىپ، الماتىعا كەتتى. وسىدان كەيىن ۇلكەن قىزىم اناسىنا ورالۋدان مۇلدە باس تارتتى. ەكىنشى بالامىزدىڭ دەنساۋلىعىندا ەرەكشەلىگى بار، وعان ەرەكشە كۇتىم كەرەك”، – دەدى ەرەكەشوۆ.
نۇرجامال تاجعالييەۆا “وتباسىندا زورلىق-زومبىلىق جاساعان ادام دەپۋتاتتىق لاۋازىم يەلەنۋگە ءتيىس ەمەس” دەگەن پىكىرىن اشىق ايتقان. ال ايبار ەرەكەشوۆ بولسا، ەگەر قول كوتەرۋ فاكتىسى راس بولسا، قۇقىق قورعاۋ ورگاندارى تاراپىنان جازبا-ەسەپتەر بولۋى ءتيىس ەدى دەگەن ءۋاجىن العا تارتادى.
“ەگەر مەن شىنىمەن قول كوتەرگەن بولسام، پوليسيا شاقىرىلعان، حاتتاما تولتىرىلعان بولار ەدى. ەشقاشان مۇنداي جاعداي ورىن العان جوق. مۇنى تەكسەرۋ قيىن ەمەس”، – دەدى ول.
دەپۋتاتتىڭ مالىمدەۋىنشە، ونىڭ نەگىزگى ماقساتى — بالالاردىڭ جاعدايىن قامتاماسىز ەتىپ، وتباسى مۇشەلەرىنىڭ تۇراقتىلىعىن ساقتاۋ.
“اجىراسۋ – ءوز الدىنا اۋىر تاقىرىپ. بالالار دا زارداپ شەكپەۋى كەرەك. مەن ەشقاشان زاڭدى بۇزعان ەمەسپىن، سوندىقتان ءوز اتىمدى ءارى ابىرويىمدى قورعاۋ ءۇشىن بارىمدى سالامىن”، – دەپ تۇيىندەدى ەرەكەشوۆ.
دەپۋتاتتىڭ جاۋابىنان سوڭ ماسەلەنىڭ ناقتى باعاسىن قۇقىق قورعاۋ ورگاندارى مەن سوت انىقتاماق. ەكى جاقتىڭ دا ۇسىنعان دالەلدەرى تەكسەرىلەدى، رەسمي قورىتىندى سونىڭ نەگىزىندە شىعارىلادى. ەندەشە، بۇل ءىس بويىنشا تۇپكىلىكتى شەشىمدى الدا كۇتۋگە تۋرا كەلەدى.
