Атырау облыстық мәслихатының депутаты Айбар Ерекешов бұрынғы жұбайының тұрмыстық зорлық жөніндегі айыптауларын жоққа шығарды, деп хабарлайды Dalanews.kz.
Orda.kz тілшісінің хабарлауынша, Атырау облыстық мәслихатының депутаты Айбар Ерекешов бұрынғы әйелі Нұржамал Тажғалиеваның “көп жылдық тұрмыстық зорлық-зомбылық болды” деген айыптауларына түсініктеме берді. Ол бұрынғы жұбайының айтқандарының бәрін “жалған және жала” деп атап, ешқашан қол көтермегенін мәлімдеді.
Депутаттың айтуынша, Нұржамалдың жарақаттары мүлде басқа жағдайларға байланысты болған.
“Ол 2018 жылы басынан жарақат алып, ауруханаға түскен. Бірақ бұл оқиға оның үйге мас күйінде келіп, тайып жығылуынан басталды. Кейін автомобиль апатына ұшырап, тағы жарақаттанды. Сол кезде біз бөлек тұрып жатқан едік”, – деді Ерекешов.
Сонымен қатар депутат “нәзік жанға қол көтерген емеспін” деп, физикалық күш көрсету фактісін толық жоққа шығарды.
“Екеуміз бірге болған кезде жалғыз рет араласқан жағдайымыз бар. Ол кезде мен үлкен қызымыз екеуінің арасындағы жанжалды тоқтатпақ болдым. Басқа ешқандай күш көрсету әрекеті болмады, оны дәлелдеу оңай. Полиция шақырылды деген ресми деректер де жоқ”, – деп нақтылады ол.
Ерекешовтың сөзінше, ресми ажырасу 2023 жылы болған. Бірақ оның бастамашысы Нұржамалдың өзі болғанын айтты.
“2018 жылы басталған жанжалды қоя тұрып, 2023 жылы мен де ажырасуға арыз жаздым. Оған дейін Нұржамал бір айға Еуропаға кетіп, емшектегі баланы тастап кетті. Содан кейін ажырасуға бел будым. Оның талабымен мен оған екі пәтер мен бір автокөлік қалдырдым. Сол кезде ол ‘маған алимент қажет емес’ деп мәлімдеді”.
Дегенмен, 2024 жылдың желтоқсанында экс-жұбайы ойынан айнып, алимент талап ете бастаған.
“Ол іс бойынша сот орындаушысы есеп жүргізді. Мен қаңтардан бастап төлеуге кірісетінімді айттым. Ешқашан міндетімді орындаудан жалтарған емеспін”, – деп атап өтті депутат.
Депутат балалардың анасымен қалғанын, алайда өзі де тұрақты түрде араласып, көмектесіп тұрғанын жеткізді. 2024 жылдың қарашасында бұрынғы жұбайы тағы да үйінен кетіп қалғанын айтып отыр.
“Ол төрт баланы 17 жастағы қызға қалдырып, Алматыға кетті. Осыдан кейін үлкен қызым анасына оралудан мүлде бас тартты. Екінші баламыздың денсаулығында ерекшелігі бар, оған ерекше күтім керек”, – деді Ерекешов.
Нұржамал Тажғалиева “отбасында зорлық-зомбылық жасаған адам депутаттық лауазым иеленуге тиіс емес” деген пікірін ашық айтқан. Ал Айбар Ерекешов болса, егер қол көтеру фактісі рас болса, құқық қорғау органдары тарапынан жазба-есептер болуы тиіс еді деген уәжін алға тартады.
“Егер мен шынымен қол көтерген болсам, полиция шақырылған, хаттама толтырылған болар еді. Ешқашан мұндай жағдай орын алған жоқ. Мұны тексеру қиын емес”, – деді ол.
Депутаттың мәлімдеуінше, оның негізгі мақсаты — балалардың жағдайын қамтамасыз етіп, отбасы мүшелерінің тұрақтылығын сақтау.
“Ажырасу – өз алдына ауыр тақырып. Балалар да зардап шекпеуі керек. Мен ешқашан заңды бұзған емеспін, сондықтан өз атымды әрі абыройымды қорғау үшін барымды саламын”, – деп түйіндеді Ерекешов.
Депутаттың жауабынан соң мәселенің нақты бағасын құқық қорғау органдары мен сот анықтамақ. Екі жақтың да ұсынған дәлелдері тексеріледі, ресми қорытынды соның негізінде шығарылады. Ендеше, бұл іс бойынша түпкілікті шешімді алда күтуге тура келеді.
