«AstraZeneka» bıofarmasevtıkalyq kompanıasy jáne «Qazaqstandyq júrek jetkiliksizdigi mamandarynyń qoǵamy» respýblıkalyq qoǵamdyq birlestigi júrek jetkiliksizdigi boıynsha dıagnostıka jasaý jáne emdeý salasyndaǵy uzaq merzimdi yntymaqtastyq týraly birlesken Memorandýmǵa qol qoıdy. Taraptar Qazaqstanda júrek-qan tamyrlary aýrýlary bar pasıentterdiń ómir súrý sapasyn jaqsartý úshin kúsh-jigerdi biriktirýge nıetti.
Memorandýmǵa qol qoıýǵa Qazaqstandaǵy «AstraZeneka» ókildiginiń dırektory Marıa Shıpýleva men «Qazaqstandyq júrek jetkiliksizdigi mamandarynyń qoǵamy» RQB Prezıdenti Saltanat Andosova qatysty.
«AstraZeneka» bıofarmasevtıkalyq kompanıasy men «Qazaqstandyq júrek jetkiliksizdigi mamandarynyń qoǵamy» RQB arasyndaǵy bastama dıagnostıkany jaqsartý salasyndaǵy yntymaqtastyqty jáne amıloıdoz sıaqty júrekke áseri bar sırek kezdesetin aýrýlardy emdeýge ınovasıalyq tásilderdi engizýdi kózdeıdi.
Dúnıejúzilik densaýlyq saqtaý uıymynyń málimeti boıynsha, júrek-qan tamyrlary aýrýlary álemde ólim-jitim boıynsha qaıǵyly basymdyqty burynnan saqtap keledi, al Qazaqstan da bul rette tysta qalmaıdy.
Ásirese sozylmaly júrek jetkiliksizdigimen aýyratyn adamdarda joǵary qaýiptilik saqtalady, óıtkeni bul kesel kóbinese arterıalyq gıpertenzıanyń, júrektiń ıshemıalyq aýrýynyń, revmatıkalyq aqaýlardyń jáne ártúrli shyǵý tegi bar anemıanyń saldary bolyp tabylady.
Júrek-qan tamyrlary patologıasynyń erte dıagnostıkasy – salaýatty, ári sapaly uzaq ómir súrýge jáne júrek-qan tamyrlary ólimin azaıtýǵa jol ashady. Osy turǵyda yntymaqtastyq týraly memorandýmnyń mańyzdy aspektisi elimizdiń aımaqtarynda kardıologtardy, terapevtterdi, jalpy praktıka dárigerlerin, meıirbıke isi mamandaryn sozylmaly júrek jetkiliksizdigi (SJJ) baǵdarlamasyna, sondaı-aq barlyq fenotıpteri bar SJJ dıagnostıkasynyń ehokardıografıalyq ádisterine oqytý bolyp tabylady.
Saltanat Andosova, «Qazaqstandyq júrek jetkiliksizdigi mamandarynyń qoǵamy» RQB Prezıdenti: «Biz ýaqtyly dıagnostıkanyń mańyzdylyǵy týraly qaıta-qaıta aıtýdy jón sanaımyz, sebebi ol dárigerlerge júrek jetkiliksizdiginiń neǵurlym jumsaq jáne basqarylatyn kezeńin tanýǵa jol ashady, bul óz kezeginde ólim-jitimniń azaıýyna yqpal etýge múmkindik beredi. Búgin biz terapıa retinde tórt komponentti shemalardy qoldaný týraly áńgimeledik, sonymen qatar emdeýdi durys jáne ýaqtyly taǵaıyndaýdyń mańyzdylyǵyn da atap óttik. Bizdiń umtylystarymyz elimizdiń kardıologıalyq qyzmetin jaqsartýǵa baǵyttalǵan, sonyń ishinde óńirlerdegi jumysty da aıryqsha atap ótken abzal. Memorandýmǵa qol qoıý – ortaq maqsattarymyzǵa jetýdiń kezekti qadamy».
Yntymaqtastyqtyń mańyzdy maqsattarynyń biri retinde osy dıagnozdar kezdesetin pasıentterdi basqarýǵa halyqaralyq tásilder men standarttardy engizýdi, sonyń ishinde, farmakologıalyq qoldaýdy aıtýǵa negiz bar. Buǵan qosa, memorandýmnyń qabyldanýy naqty klınıkalyq praktıka jaǵdaıynda eldegi sozylmaly júrek jetkiliksizdigi bar pasıentterdi basqarý qunyn ońtaılandyrýmen baılanysty klınıkalyq-ekonomıkalyq zertteýlerdi uıymdastyrýda jańa belesterdi baǵyndyrýǵa múmkindik beredi.
– Bizdiń «Qazaqstandyq júrek jetkiliksizdigi mamandarynyń qoǵamy» RQB-men yntymaqtastyǵymyz elimizdegi sozylmaly júrek jetkiliksizdiginiń dıagnostıkasy men emdeýin jaqsartýǵa baǵyttalǵan. Biz Qazaqstanda ólim-jitimdi azaıtý jáne pasıentterdiń ómir súrý sapasyn jaqsartý maqsatynda osy aýyr keselmen neǵurlym tıimdi kúresý úshin halyqaralyq standarttar men ınovasıalyq tásilderdi engizýge tyrysamyz, – dedi Qazaqstandaǵy «AstraZeneka» ókildiginiń dırektory Marıa Shıpýleva.
Al QR Densaýlyq saqtaý mınıstrliginiń shtattan tys bas kardıology, «Qazaqstandyq júrek jetkiliksizdigi mamandarynyń qoǵamy» RQB vıse-prezıdenti Mahabbat Bekbosynova búgingi qol qoıý rásimin sozylmaly júrek jetkiliksizdigin emdeýge mamandanǵan dárigerler úshin aıtýly oqıǵa ekenin alǵa tartty.
– Memorandýmǵa qol qoıý – bul bizdiń qoǵam men «AstraZeneka» kompanıasy úshin mańyzdy is-shara, al eń bastysy, sozylmaly júrek jetkiliksizdigin emdeý baǵdarlamasynda jumys isteıtin dárigerler úshin ataýly oqıǵa. Bizdiń yntymaqtastyǵymyz pasıentterimizdiń múddelerin basshylyqqa alady. Bul erte dıagnostıka men durys emdeýdi bildiredi. Bizdiń uzaq merzimdi jáne qysqa merzimdi jobalarymyzdaǵy birlesken negizgi mindetter týraly aıtatyn bolsaq, oǵan dárigerlerge qajetti bilim berý men saraptamany usyný kiredi. Halyqaralyq standarttar men klınıkalyq hattamalarǵa sáıkes, dıagnostıka men emdeý týraly durys aqparatpen qamtamasyz etý bizge ár pasıentti terapıaǵa beıimdiligi turǵysynan baqylaýǵa ońtaıly jol usynady, – dep Mahabbat Bekbosynova oıyn ortaǵa saldy.
