Elordada esirtki qylmysyna qatysy bar 25 jastaǵy kúdikti politsiiadan qashpaq boldy, dep habarlaidy Dalanews.kz.
Jedel izdestirý is-sharalary barysynda politseiler Chery kóligin toqtatpaq bolǵan. Alaida júrgizýshi zańdy talapqa baǵynbai, toqtamai, jasyrynýǵa áreket jasaǵan. Qýǵyn barysynda ol turǵyn úi aýlasyna kirip, turaqta turǵan eki kólikpen soqtyǵysqan. Odan keiin er adam kólikti tastap, jaiaý qashpaq bolǵanymen, politsiia qyzmetkerleri ony ustady.
"Kólikti tekserý barysynda artqy oryndyǵynan jasyl tústi oqshaýlaǵysh taspamen oralǵan, untaq tárizdi zat salynǵan orama tabyldy. Saraptama qorytyndysyna sáikes onyń jalpy salmaǵy shamamen 500 gramm bolatyn Alfa-PVP esirtkisi ekeni anyqtaldy. Bul derek boiynsha qylmystyq is qozǵaldy. Kúdikti ýaqytsha ustaý izoliatoryna qamaldy", - dedi politsiia.
