Semei – oblys ortalyǵy. Osy oblysqa qarasty Aqsýat – aýdan ortalyǵy. Biraq, osyǵan qaramastan kúni keshege deiin ekiaraǵa qatynaityn avtobýstar bolmaǵan. Saldarynan ortalyqsyz máselesi sheshilmeitin aýdan jurty "taksiletip" júrýge májbúr. Iaǵni, aiaǵy aýyr kelinshekter, emtihan tapsyrýy kerek muǵalim sekildi memleketttik qyzmetkerler, jalpy dárigerge kúni túskender (diagnostika tek ortalyqta), túrli qujatty túgendeýshiler, taǵysy taǵy degendei. Bastysy, oblys pen aýdan arasyna qatynaǵan taksilerde damyl joǵy, ras endi, dep habarlaidy Dalanews.kz.
Al taksi quny bir adamǵa – 8 myń teńge. Ásirese, qaltasy juqa stýdentterge qiyn. Olardyń demalysy bastalǵanda baǵa, tipti 11 myń teńgege deiin bir-aq sharyqtaidy. Biraq, "ózine bi, ózine qoja" jekemenshikke ne deisiz, kónbesten basqa amal qaida? Osyndai qiyndyqpen betpe-bet kelip júrgen aqsýattyqtarǵa sáýirde mynandai táýir jańalyq kelip jetti: "23 sáýirden bastap "Semei-Aqsýat" jańa baǵyty ashylady, saǵat 9:00-de Semei beketinen Aqsýatqa, al Aqsýattan saǵat 17-00-de Semeige kúnara, taq kúnderi avtobýs shyǵatyn bolady, bir oryn quny – 2500 teńge".
Osy kúiinde jergilikti chatqa kelip túsken bul súiinshi habar aýdan halqyn dúr etkizdi. Ásirese, qoljetimdi baǵa báriniń kóńiline qona ketti. Árine, baǵa úsh ese arzan bolsa. Osy jaǵynan alǵanda, aqsýattyqtar jańa oblys basshysyna dán riza. "Endi osy jaqsylyq uzaǵynan súiindirse" degen bir-aq tilek bar olarda. Óitkeni osyǵan deiin arakidik ekiarada tóbe kórsetken avtobýstar jylt etken "jaqsy jarnama" qusap, kóp uzamai qarasyn batyryp otyrypty. Sebebi belgisiz...
