Qazaqstanda zeinetaqy jinaqtarynyń jetkiliktilik shegin kóterý qoǵamda qyzý talqylanyp jatqan tusta qarjyger Rasýl Rysmambetov bul sheshimdi qoldap, basty nazar zeinetaqy jinaǵyn alýǵa emes, azamattardyń resmi tabysyn arttyrýǵa aýdarylýy tiis ekenin aitty, dep habarlaidy Dalanews.kz.
Qarjygerdiń pikirinshe, zeinetaqy júiesiniń negizgi mindeti – azamattardy qartaiǵan shaqta turaqty tabyspen qamtamasyz etý. Sondyqtan zeinetaqy jinaqtaryn turǵyn úi satyp alý nemese jóndeý siiaqty aǵymdaǵy qajettilikterdi sheshýdiń quraly retinde qarastyrý durys emes.
«Men árdaiym zeinetaqy jinaqtaryn jappai alýǵa qarsy boldym. Óz tabiǵaty boiynsha zeinetaqy aqshasy páter alýǵa nemese jóndeýge arnalǵan qarajat emes. Bul – adamnyń eńbek etý múmkindigi burynǵydai bolmaityn qarttyq shaǵyna arnalǵan qarjy. Sondyqtan jetkiliktilik sheginiń kóterilýin qisyndy ári ýaqytyly sheshim dep sanaimyn», – dep jazdy Rasýl Rysmambetov óziniń Telegram-arnasynda.
Onyń aitýynsha, azamattardyń búgin jinaǵyn merziminen buryn paidalanýy erteńgi zeinetaqy tólemderiniń azaiýyna alyp keledi. Sarapshy qysqa merzimdi áleýmettik áser uzaq merzimdi táýekelderdi týyndatýy múmkin ekenin atap ótti.
Rysmambetovtiń pikirinshe, memleket azamattardyń zeinetaqy jinaǵyn sheship alýyna jaǵdai jasaýdan góri, joǵary resmi jalaqy alýǵa yntalandyrýy qajet. Sebebi resmi tabys ósken saiyn Biryńǵai jinaqtaýshy zeinetaqy qoryna túsetin jarnalar kólemi de artady.
«Biz ENPF-dan aqshany qalai alý kerektigin emes, joǵary resmi jalaqy alatyn adamdardyń sanyn qalai kóbeitý kerektigin talqylaýymyz qajet. Bul – jahandyq ári makroekonomikalyq mindet. Jalaqy neǵurlym joǵary bolsa, qorǵa túsetin jarna kólemi de artady, sáikesinshe bolashaqtaǵy zeinetaqy mólsheri de ósedi», – dedi ol.
Qarjyger buǵan deiin zeinetaqy qarajatyn merziminen buryn paidalaný turǵyn úi naryǵyndaǵy baǵanyń ósýine de áser etkenin aitty. Onyń sózinshe, jinaqtardyń bir bóligi jyljymaityn múlik naryǵyna baǵyttalyp, bul baspana baǵasynyń kúrt qymbattaý faktorlarynyń birine ainaldy.
Sondai-aq sarapshy jetkiliktilik shegi eldegi ekonomikalyq jaǵdaiǵa sáikes ózgerýi tiis ekenin atap ótti. Ómir súrý uzaqtyǵynyń artýy, infliatsiia jáne eń tómengi zeinetaqy mólsheriniń ósýi mundai kórsetkishterdiń de qaita qaralýyn talap etedi.
Rysmambetovtiń pikirinshe, kelesi kezeńde zeinetaqy aktivterin basqarý tásilderin jetildirý jáne olardyń tiimdiligin arttyrý máselesine erekshe nazar aýdarý qajet.
