Májilis depýtaty Ashat Aimaǵambetov bilim berý salasyna qatysty qabyldanǵan jańa zań normasyna alańdaýshylyq bildirdi. Onyń aitýynsha, bul sheshim saladaǵy eń tiimsiz ári qisynsyz qadamdardyń biri bolýy múmkin, dep habarlaidy dalanews.kz.
Depýtat Senattan kelgen zań jobasy Májiliste birneshe ret talqylanǵanyn, sol kezde birqatar eskertý men dálel aitylǵanyn atap ótti. Alaida, onyń sózinshe, sarapshylardyń pikiri men talqylaý barysynda kóterilgen ýájder eskerilmegen.
"Búgin bilim berý salasyna bailanysty eń tiimsiz ári eń qisynsyz sheshimderdiń biri qabyldandy. Senattan kelgen zań jobasyn biz birneshe ret talqyladyq. Kádimgidei pikirtalas boldy. Biraq sol kezdegi pikirtalasta aitylǵan argýmentterdi eskermei, sarapshylardyń pikirin tyńdamai, únsiz túrde 4 mln balanyń taǵdyryna teris áser etetin sheshim qabyldandy", – dedi Ashat Aimaǵambetov.
Onyń aitýynsha, negizgi másele mektepter men balabaqshalarǵa qatysty basqarý quzyretin oblys ákimderinen alyp, aýdan ákimderine berý týraly sheshimge bailanysty.
