سەمەي – وبلىس ورتالىعى. وسى وبلىسقا قاراستى اقسۋات – اۋدان ورتالىعى. ءبىراق، وسىعان قاراماستان كۇنى كەشەگە دەيىن ەكىاراعا قاتىنايتىن اۆتوبۋستار بولماعان. سالدارىنان ورتالىقسىز ماسەلەسى شەشىلمەيتىن اۋدان جۇرتى "تاكسيلەتىپ" جۇرۋگە ءماجبۇر. ياعني، اياعى اۋىر كەلىنشەكتەر، ەمتيحان تاپسىرۋى كەرەك ءمۇعالىم سەكىلدى مەملەكەتتتىك قىزمەتكەرلەر، جالپى دارىگەرگە كۇنى تۇسكەندەر (دياگنوستيكا تەك ورتالىقتا)، ءتۇرلى قۇجاتتى تۇگەندەۋشىلەر، تاعىسى تاعى دەگەندەي. باستىسى، وبلىس پەن اۋدان اراسىنا قاتىناعان تاكسيلەردە دامىل جوعى، راس ەندى، دەپ حابارلايدى Dalanews.kz.

ال تاكسي قۇنى ءبىر ادامعا – 8 مىڭ تەڭگە. اسىرەسە، قالتاسى جۇقا ستۋدەنتتەرگە قيىن. ولاردىڭ دەمالىسى باستالعاندا باعا، ءتىپتى 11 مىڭ تەڭگەگە دەيىن ءبىر-اق شارىقتايدى. ءبىراق، "وزىنە بي، وزىنە قوجا" جەكەمەنشىككە نە دەيسىز، كونبەستەن باسقا امال قايدا؟ وسىنداي قيىندىقپەن بەتپە-بەت كەلىپ جۇرگەن اقسۋاتتىقتارعا ساۋىردە مىنانداي ءتاۋىر جاڭالىق كەلىپ جەتتى:  "23 ساۋىردەن باستاپ "سەمەي-اقسۋات" جاڭا باعىتى اشىلادى، ساعات 9:00-دە سەمەي بەكەتىنەن اقسۋاتقا، ال اقسۋاتتان ساعات 17-00-دە سەمەيگە كۇنارا، تاق كۇندەرى اۆتوبۋس شىعاتىن بولادى، ءبىر ورىن قۇنى – 2500 تەڭگە".

وسى كۇيىندە جەرگىلىكتى چاتقا كەلىپ تۇسكەن بۇل ءسۇيىنشى حابار اۋدان حالقىن ءدۇر ەتكىزدى. اسىرەسە، قولجەتىمدى باعا ءبارىنىڭ كوڭىلىنە قونا كەتتى. ارينە، باعا ءۇش ەسە ارزان بولسا. وسى جاعىنان العاندا، اقسۋاتتىقتار جاڭا وبلىس باسشىسىنا ءدان ريزا. "ەندى وسى جاقسىلىق ۇزاعىنان سۇيىندىرسە" دەگەن ءبىر-اق تىلەك بار ولاردا. ويتكەنى وسىعان دەيىن اراكىدىك ەكىارادا توبە كورسەتكەن اۆتوبۋستار جىلت ەتكەن "جاقسى جارناما" قۇساپ، كوپ ۇزاماي قاراسىن باتىرىپ وتىرىپتى. سەبەبى بەلگىسىز...