Sońǵy kúnderi AQSh valiýtasy qomaqty túrde qunyn joǵaltýda. Baqandai 530-dan qazir 500 teńgege deiin túsip, tipti odan da tómendep jatqan jaiy bar. Buǵan, ádettegidei, salyq maýsymy kezeńinen góri geosaiasat kóbirek yqpal etip jatqan sekildi, dep jazady Dalanews.kz.
Ekonomist Ǵalymjan Aitqazinniń aitýynsha, búgin Resei Federatsiiasynda rýbl nyǵaiyp, 1 AQSh dollary 93 rýbl bolǵan. Árine, onyń teńgege de yqpaly bolmai qalmapty. Ol búgin nemese erteń 1 AQSh dollarynyń baǵasy 500 teńgeden de tómendeýi yqtimal ekenin aitady ári Reseide AQSh valiýtasyna shaqqanda rýbldiń nyǵaiýy jáne shetel valiýtasyna degen suranystyń kúrt tómendeýine geosaiasat túrtki bolýy múmkin dep sanaidy.
"Politiko, Associated Press jáne basqa da osy sekildi kóptegen bedeldi saiasi basylymdar kesheli beri óz derekkózderine silteme jasai otyryp, Tramptyń Resei men Ýkraina qaqtyǵysyndaǵy barlyq taraptardy beibit kelisimge kelý úshin qysym jasap jatqanyn jarysa jazýda. Eger Tramp óziniń sailaýaldy ýádesin oryndai alsa, onda bolashaqta Resei ekonomikasyna qysym deńgeii tómendeýi múmkin. Árine, bul sanktsiialardyń birden alynatynyn bildirmeidi, biraq, eń qurymaǵanda, sanktsiia qysymy bosańsyp, onymen bailanysty táýekelder birtindep azaiýy múmkin. Qazaqstan úshin bul da jaqsy habar bola alady ma, qalai? Tek aqsha baǵamyna jasalǵan qysymdy tómendetý faktory turǵysynda ǵana emes", - dep jazdy ol Tengemonika Telegram arnasynda.
Buǵan deiin birjada 1 AQSh dollarynyń quny 500 teńgeden de tómendegenin jazǵan bolatynbyz. Sondai-aq Donald Tramp dollardan bas tartýy múmkin degen qaýippen BRIKS-ke doq kórsetken bolatyn.
