Aqmola oblysynyń birneshe aýdanynda sý tasqyny qaýpi artyp otyr, dep habarlaıdy Dalanews.kz.

Osyǵan baılanysty Tótenshe jaǵdaılar vıse-mınıstri Kegen Tursynbaev óńirdegi qaýipti ýchaskelerdi aralap, jaǵdaıdy baǵalady.

Vedomstvo málimetinshe, sý tasqyny kezeńine daıyndyq aıasynda Kegen Tursynbaev elordalyq aglomerasıa aýmaǵyndaǵy ahýaldy tekserdi. Jumys sapary barysynda ol Arshaly jáne Selınograd aýdandaryndaǵy gıdrotehnıkalyq nysandardy qarap, yqtımal qaýiptiń aldyn alý sharalarymen tanysty.

"Sý tasqynyna qarsy is-sharalar barlyq qyzmetterdiń ýaqytyly ári úılesimdi jumysyn qajet etedi. Basty mindet – halyq pen ınfraqurylymǵa tónetin qaýip-qaterdi barynsha azaıtý. Injenerlik qurylystardyń tasqynǵa tótep berýge ázirligi jáne jedel qyzmetterdiń shuǵyl áreket etýge daıyndyǵy asa mańyzdy. Biz jaǵdaıdy turaqty baqylaýda ustap, qajet bolǵan jaǵdaıda jedel sharalar qabyldaımyz", – dedi Kegen Tursynbaev.

Aıta keteıik, buǵan deıin Tótenshe jaǵdaılar mınıstri Shyńǵys Árinov kóktemde qaı óńirlerde sý tasqyny bolýy múmkin ekenin aıtqan bolatyn.

"Eger eldi mekender sanyn eskersek, birinshi orynda Batys Qazaqstan oblysy, odan keıin Qaraǵandy, Aqmola, Soltústik Qazaqstan jáne Shyǵys Qazaqstan oblystary tur", – dedi Árinov májilis kýlýarynda.

Aıta keteıik,Qazaqstanda 1223 eldi meken sý basý qaýpi bar aımaqta ornalasqan. 

Bul týraly Tótenshe jaǵdaılar mınıstrliginiń baspasóz qyzmeti habarlaǵan bolatyn.

“Aımaqtarda aldyn alý jáne ınjenerlik jumystar júrgizilip, olardyń iske asyrylýyn TJM bólimsheleri qadaǵalaýda. Sý tasqynynyń aldyn alý sharalary respýblıkalyq jáne óńirlik baǵdarlamalyq qujattar aıasynda júzege asyrylýda. Qazirgi tańda elimizde 1223 eldi meken sý basý qaýpi joǵary aımaqtarda ornalasqan”, – delingen dúısenbi kúni taratylǵan habarlamada.

Mınıstrliktiń málimetinshe, jalpy elimiz boıynsha 1400 sý tasqynyna qarsy is-shara júzege asyrylǵan.