Ázerbaijanǵa tiesili áýe kompaniiasynyń ushaǵynyń apatqa ushyraýyna qatysty taǵy birneshe adam tergeýden óte bastady, - dep habarlaidy Dalanews.kz.
VChK-OGPÝ telegram arnasynyń málimetinshe, AZAL áýe kompaniiasynyń ushaǵy apatyna qatysty tergeý barysynda keshe keshkisin dispetcher Ali Idrisovpen qatar Groznyi áýejaiyndaǵy ushý qyzmetiniń jetekshisi Djamlail Bakanaev ta jaýap berdi.
Aita keteiik, ushý qyzmetiniń jetekshisi ushý-qoný jolaǵynyń, radiotehnikalyq jáne bailanys quraldarynyń jaǵdaiyn jeke tekserip, áýejaidyń ushaqtardy qabyldaýǵa jáne ushyrýǵa daiyndyǵy týraly qorytyndy jasaidy.
VChK-OGPÝ málimetinshe, Djamlail Bakanaev barlyq júielerdiń durys jumys istep turǵanyn jáne olardy óz mindetteri aiasynda teksergenin aitqan. Onyń sózinshe, sol kezde «Baký-Groznyi» reisiniń qonýyna eshqandai kedergi bolmaǵan.
Ol mundai kedergilerdi aldyn ala boljai da almaǵanyn aitty. Aita keteiik, ushaq áýejaiǵa jaqyndaǵanda GPS datchikteriniń signaly joǵalyp, bailanys úzilgen, al ushqyshtardyń áýe kemesin derlik soqyr kúide basqarýǵa májbúr boldy.
VChK-OGPÝ buǵan deiin habarlaǵandai, «Kover» josparynyń engizilgeni týraly aqparat ushý qyzmetiniń jetekshisine tym kesh jetken. Bul derekti Djamlail Bakanaev ta rastady.
Buǵan deiin tragediia kezinde ushaqty basqarǵan dispetcher Ali Idrisov bolǵan, ol Ramzan Qadyrovtyń súiikti klýby "Terek" (qazirgi "Ahmat") komandasynyń burynǵy oiynshysy ekenin habarlaǵan edik. 29 jeltoqsanda keshki ýaqytta ony tergeý amaldary júrgizilgen.
Idrisov áýe qorǵanysy júiesiniń jumys istep turǵanyn bilmegenin, al "Kover" rejimi týraly aqparatty oqiǵadan bes minýt ótken soń ǵana alǵanyn málimdedi.
"29 jeltoqsanda kesh boiy Reseidiń Tergeý komitetiniń tergeýshileri Groznyidaǵy áýe qozǵalysyn uiymdastyrý jónindegi memlekettik korporatsiianyń jergilikti filialynyń qyzmetkerlerin tergedi. Áýe oqiǵasyna qatysty kýáger retinde jaýap bergen dispetcher Ali Idrisov "Baký-Groznyi" reisin qondyrýdy uiymdastyrǵan.
Qyzyq derek: Ali Idrisov dispetcher bolmas buryn kásibi fýtbolshy bolǵan jáne Groznyidyń "Terek" (qazirgi "Ahmat") komandasynda oinaǵan. 2016 jyly fýtbol mansabyn aiaqtaǵan soń, ol Qurylysshylardyń óńiraralyq birlestigine zańger bolyp jumysqa ornalasqan. Birneshe jyl ótken soń, 33 jastaǵy Ali Idrisov dispetcher qyzmetine kiristi", - delingen telegramdaǵy jazbada.
VChK-OGPÝ málimetinshe, Idrisov bul oqiǵany ekipajdyń habarlamasyna súiene otyryp, sońyna deiin qustarmen soqtyǵysý saldarynan bolǵan dep oilaǵan.
