ازەربايجانعا تيەسىلى اۋە كومپانياسىنىڭ ۇشاعىنىڭ اپاتقا ۇشىراۋىنا قاتىستى تاعى بىرنەشە ادام تەرگەۋدەن وتە باستادى، - دەپ حابارلايدى Dalanews.kz.
ۆچك-وگپۋ تەلەگرام ارناسىنىڭ مالىمەتىنشە، AZAL اۋە كومپانياسىنىڭ ۇشاعى اپاتىنا قاتىستى تەرگەۋ بارىسىندا كەشە كەشكىسىن ديسپەچەر الي يدريسوۆپەن قاتار گروزنىي اۋەجايىنداعى ۇشۋ قىزمەتىنىڭ جەتەكشىسى دجاملايل باكانايەۆ تا جاۋاپ بەردى.
ايتا كەتەيىك، ۇشۋ قىزمەتىنىڭ جەتەكشىسى ۇشۋ-قونۋ جولاعىنىڭ، راديوتەحنيكالىق جانە بايلانىس قۇرالدارىنىڭ جاعدايىن جەكە تەكسەرىپ، اۋەجايدىڭ ۇشاقتاردى قابىلداۋعا جانە ۇشىرۋعا دايىندىعى تۋرالى قورىتىندى جاسايدى.
ۆچك-وگپۋ مالىمەتىنشە، دجاملايل باكانايەۆ بارلىق جۇيەلەردىڭ دۇرىس جۇمىس ىستەپ تۇرعانىن جانە ولاردى ءوز مىندەتتەرى اياسىندا تەكسەرگەنىن ايتقان. ونىڭ سوزىنشە، سول كەزدە «باكۋ-گروزنىي» رەيسىنىڭ قونۋىنا ەشقانداي كەدەرگى بولماعان.
ول مۇنداي كەدەرگىلەردى الدىن الا بولجاي دا الماعانىن ايتتى. ايتا كەتەيىك، ۇشاق اۋەجايعا جاقىنداعاندا GPS داچيكتەرىنىڭ سيگنالى جوعالىپ، بايلانىس ۇزىلگەن، ال ۇشقىشتاردىڭ اۋە كەمەسىن دەرلىك سوقىر كۇيدە باسقارۋعا ءماجبۇر بولدى.
ۆچك-وگپۋ بۇعان دەيىن حابارلاعانداي، «كوۆەر» جوسپارىنىڭ ەنگىزىلگەنى تۋرالى اقپارات ۇشۋ قىزمەتىنىڭ جەتەكشىسىنە تىم كەش جەتكەن. بۇل دەرەكتى دجاملايل باكانايەۆ تا راستادى.
بۇعان دەيىن تراگەديا كەزىندە ۇشاقتى باسقارعان ديسپەچەر الي يدريسوۆ بولعان، ول رامزان قادىروۆتىڭ سۇيىكتى كلۋبى "تەرەك" (قازىرگى "احمات") كومانداسىنىڭ بۇرىنعى ويىنشىسى ەكەنىن حابارلاعان ەدىك. 29 جەلتوقساندا كەشكى ۋاقىتتا ونى تەرگەۋ امالدارى جۇرگىزىلگەن.
يدريسوۆ اۋە قورعانىسى جۇيەسىنىڭ جۇمىس ىستەپ تۇرعانىن بىلمەگەنىن، ال "كوۆەر" رەجيمى تۋرالى اقپاراتتى وقيعادان بەس مينۋت وتكەن سوڭ عانا العانىن مالىمدەدى.
"29 جەلتوقساندا كەش بويى رەسەيدىڭ تەرگەۋ كوميتەتىنىڭ تەرگەۋشىلەرى گروزنىيداعى اۋە قوزعالىسىن ۇيىمداستىرۋ جونىندەگى مەملەكەتتىك كورپوراسيانىڭ جەرگىلىكتى فيليالىنىڭ قىزمەتكەرلەرىن تەرگەدى. اۋە وقيعاسىنا قاتىستى كۋاگەر رەتىندە جاۋاپ بەرگەن ديسپەچەر الي يدريسوۆ "باكۋ-گروزنىي" رەيسىن قوندىرۋدى ۇيىمداستىرعان.
قىزىق دەرەك: الي يدريسوۆ ديسپەچەر بولماس بۇرىن كاسىبي فۋتبولشى بولعان جانە گروزنىيدىڭ "تەرەك" (قازىرگى "احمات") كومانداسىندا ويناعان. 2016 جىلى فۋتبول مانسابىن اياقتاعان سوڭ، ول قۇرىلىسشىلاردىڭ ءوڭىرارالىق بىرلەستىگىنە زاڭگەر بولىپ جۇمىسقا ورنالاسقان. بىرنەشە جىل وتكەن سوڭ، 33 جاستاعى الي يدريسوۆ ديسپەچەر قىزمەتىنە كىرىستى"، - دەلىنگەن تەلەگرامداعى جازبادا.
ۆچك-وگپۋ مالىمەتىنشە، يدريسوۆ بۇل وقيعانى ەكيپاجدىڭ حابارلاماسىنا سۇيەنە وتىرىپ، سوڭىنا دەيىن قۇستارمەن سوقتىعىسۋ سالدارىنان بولعان دەپ ويلاعان.
