Ánniń baǵyn ashatyn ánshi
Sanaly ǵumyryn qasietti ónerge arnap, halyqtyń alǵysyna bólenip júrgen belgili estrada ánshisi, «Qazaqstan Respýblikasynyń mádeniet qairatkeri» Gúlnara Keńesbekqyzy Qazaqstan estradasynyń órkendep, gúldenýine ózindik úlesin qosyp kele jatqan kásibi ánshi ári tájiribeli pedagog.
Boiyna bitken talantynyń arqasynda talanyna qarai etken eńbegi de esh ketken joq. Mektep sahnasynan bastaý alǵan óner óresiniń biigine qarai qanaty talmai ter tógip keledi. Óner óz biigine jetelei júrip, ony talai shyń-quzdardan qulatsa da, án álemine qaita sharyqtaýdan qanaty bir talǵan emes. Birde ánshiniń baǵyn án ashsa, endi birde ánniń baǵyn ánshi ashatynynyń naǵyz keiipkeri osy Gúlnara Keńesbekqyzy desek te bolady.
– Baiqońyr qalasynyń 50 jyldyǵyna orai uiymdastyrylǵan saltanatty merekege kelgen eki el Prezidentteri V. Pýtin men N. Nazarbaev aldynda «Meniń Qazaqstanym» ánin oryndap shyǵý (ol kezde jai ǵana án bolatyn) meniń baqytyma buiyrdy, – deidi óner iesi. Osy ánnen keiin Elbasy Nursultan Ábishuly maǵan «Qazaqstan Respýblikasynyń mádeniet kairatkeri» ataǵyn berý týraly usynys jasapty, al «Meniń Qazaqstanym» áni Elbasynyń redaktsiialaýymen ánuranǵa ainaldy. Osy oryndaýdan keiin araǵa jarty jyl salyp, keýdeme «Qazaqstan Respýblikasynyń mádeniet qairatkeri» belgisin taǵyp, ataq aldym. Bul meniń ónerge arnaǵan 20 jyl ómirimniń nátijesi dep bilemin.
Jeti jasymnan bastap mektep sahnasynda án aityp, bi bilei bastadym. Bala kezimde osy ónerimdi tap basa bilgen ómirimdegi eń qadirli jan, anam Oiynkúl Dúisebekqyzy oryndaityn ár ánime jeke-jeke kóilekter tigip beretin. Halyq ánderin jaqsy kórdim. Kóńilim qalaǵan kezde romans, klassika janryndaǵy ánderdi de súiip oryndaimyn. Alǵash bitirgen oqý ornym Qyzylorda Mýzykalyq Ýchilishesiniń vokal klasy boldy, buǵan qosa anamnyń klaviatýralyq soprana daýysy janyma jyly áser etetin. Ánshilik óner anamnan daryǵan bolýy kerek. Onyń ústine názik jandy áiel úshin qyzyǵy men qiyndyǵy birge júretin óner jolyna baǵyt-baǵdar berýshi de anam boldy.
Kolledjdi bitirip, qolyma diplom alǵannan keiin Qyzylorda oblysynyń Tereńózek aýdanynda belgili sazger Ramazan Taimanovpen kanattasyp, mádeni salada birge qyzmet atqardyq. Toqsanynshy jyldary Baiqońyr qalasyndaǵy ofitserler Úiiniń ónshisi bolyp, eki el arasyndaǵy mádeni bailanysty nyǵaitý jolynda eńbek ettim, qazaq ánderi mektebin qalyptastyryp, shákirt tirbieledim.
Sondai-aq, belgili estrada juldyzdary Roza Rymbasva, Baqytjan Kajymuqanov, Merýert Túsipbaevalarmen sahna tórine birge shyqqan kezderim boldy. Ózim kishkentaiynan án aitýǵa degen súiispenshiligin oiatyp, tárbielegen shákirtim qarmaqshylyq Ardaq Ysqaqovanyń da esimin erekshe ataǵym keledi. Ónerdiń órine talpynǵan babalaýsa ánshiniń bolashaǵy jarqyn dep oilaimyn. Óner jolyndaǵy qyzmetimdi atqara júrip 2005 jyly Almatydaǵy qyzdar pedagogikalyq institýtynyń mýzyka fakýltetin bitirdim.
Búginde Gúlnara Keńesbekqyzy tórt balanyń anasy, onshaqty nemere uldar men monshaqty qyzdardyń ájesi atanyp otyrǵan bilikti maman. Quralai, Juldyzai esimdi egiz kyzdary Qazanǵap atyndaǵy mýzykalyq kolledjiniń bi bóliminde dáris alyp, respýblikalyq «Saltanat» memlekettik án-bi ansambliniń beldi músheleri atanǵan. Uldary el jaqta bir-bir shańyraq ieleri bolsa, anasynyń óner jolyn jalǵastyryp kele jatqan kóziniń qarashyǵyndai qos qarlyǵashy bolashaktarynan úlken úmit kúttiretin kásibi mamandar.
Osylaisha balapandarynyń ónerin úkilep kelgen ónerli ana búginde óner ordasy Almaty qalasyna qonys aýdarǵan. Gúlnara Keńesbekqyzynyń endigi armany qazaqtyń erteden kele jatqan dástúrli ónerin jańǵyrtý. Tájiribeli ustaz balalardy mektep qabyrǵasynan bastap ónerge yntasyn oiatyp, án aitýda mýzykalyq qabiletin qalyptastyrýmen qatar, ortaq tabysqa qýana bilý, estetikalyq talǵam sezimderin damytýǵa tárbieleý isin qolǵa alý.
Daryndy jastardyń shyǵarmashylyǵyn shyńdap, qazaqtyń erteden kele jatqan dástúrli ónerin jańǵyrtý. Oqýshylardyń ónerge yntasyn oiatyp, án aitýda mýzykalyq qabiletin qalyptastyrýmen qatar, ortaq tabysqa qýana bilý, estetikalyq talǵam sezimderin damytýǵa tárbieleýde mektep muǵalimderine baǵyt berý kerek degen usynysyn bildirýge qaladaǵy «Ustazdar Úiine» kelgen tájiribeli ustazben bolǵan áńgimemizdiń jai-japsary osylai boldy.
Al, maman tarapynan bolǵan usynystyń sheshimin shyǵarýdy «Órleý» biliktilikti arttyrý Ulttyq ortalyǵy aktsionerlik qoǵamynyń filialy Almaty qalasy boiynsha pedagogikalyq qyzmetkerlerdiń biliktiligin arttyrý institýtynyń Oqý bólimi jáne Monitoringtik qyzmet bólimi qyzmetkerleriniń quzyryna qaldyrdyq.
Sh. Biten
