Otandyq "Raýza" serialynda Mańqanyń rólin somdaǵan, ózge de kinolarda boi kórsetip júrgen tanymal akter Sherhan Pirnazar balalyq shaǵy qalai ótkenin baiandap berdi, dep habarlaidy Dalanews.kz.
“Sálem, Evropa” arnasyna ártis áke-sheshesi erterekte ajyrasyp ketkenin, ózi ájesiniń baýyrynda óskenin jasyrmady.
“Men ájemniń balasy boldym, onyń segiz balasy boldy, bireýi qyz, toǵyzynshysy men edim. Jatsa da, tursa da janynan tastamaityn. Ájemniń jeti balasy bir úide turǵan. Jeti kelinniń ishinen meniń mamamdy erekshe jaqsy kórip, tirlik istetpei erkeletken. Biraq áke-sheshem ajyrasyp ketti. Sol kezde qatty jylaǵanym esimde. Sonda ájem óz balasyna “nemeremdi jetim ettiń” dep qatty urysqan. Sol ketkennen ákem úige kelmedi", - dedi óner iesi.
Ol tórt jyl buryn ǵana ákesimen kóriskenin aitty.
"Qansha degenmen ákeniń aty – áke eken. Oǵan deiin betpe-bet kezdeskende bárin aitamyn dep kijinip barǵan edim. Biraq onyń bári kórgen kezde umytylyp, ashyq sóilestik. Ákem: "Biz ajyrasqanda ájeń, "meniń nemeremdi jetim qyldyń" dep maǵan teris batasyn bergen edi, sol jaǵdaidan keiin jolym bolmady" dep ókindi", – deidi akter.
Al Mańqa 10-synyp oqyp júrgende ájesi dúnieden ótedi.
"Aýyldan aǵam kelip, meni surap áketti. Barsaq ájem ómirden ótken, adamdar jerleý úshin tabytqa salyp, meni kútip turǵan eken. Qoshtasyp úlgerdim. Ájem "Sherhan úilense toiyn ózderiń istep berińder" dep balalaryna amanattap ketken eken. Sodan men úilenip, toi jasaýǵa kelgende óz jurtym men naǵashylarym talasyp qaldy. "Bizdiń de toi jasaýǵa jaǵdaiymyz jetedi, olai bolsa qudalardy biz de kútemiz. Toidyń shyǵynyna da biz óz úlesimizdi qosamyz" dep shart qoiyp, eki jaq abyroimen atqaryp berdi”, – dedi ol shańyraq kótergen sátin eske alyp.
Sonymen qatar, akter ákesi tastap ketkennen keiin anasy ekeýiniń ómiri qalai órbigenin de áńgimeledi.
“Ákemiz ketkennen keiin anam meni oilap ekinshi ret turmysqa shyqpady. Naǵashylardyń qolynda óstim. Biraq óte qiyn boldy. Sebebi meniń ákem de, onyń baýyrlary da aýylda atys-shabys, tóbeleske jaqyn ósken. Pirnazar áýleti sondaimen atyshýly edi. Keiin anam ajyrasyp, tórkinine qaityp kelgende naǵashylarym "Sen ákeńe tartqansyń, bul jien adam bolmaidy" dep keketip, aita beretin. Ol sózdi estigen saiyn ájemniń meiirimin, mahabbatyn ańsap, jylaýshy edim. Eseiip, Almatyǵa oqýǵa ketkende de "Oi, seniń Sherhanyń adam bolmaidy, oqyp júr deisiń be, iship, qýyp júrgen shyǵar. Kóresiń, ol da ákesine uqsap, áli seni qan qaqsatady" dep aita bergen eken", - dep aǵynan jaryldy akter.
