Abai atyndaǵy Qazaq ulttyq opera jáne balet teatry 93-teatr maýsymyn Ábdijámil Nurpeiisovtiń «Qan men ter» roman-epopeiasy jelisimen qoiylǵan «AQBALA» ulttyq baletiniń premerasymen ashty, dep habarlaidy dalanews.kz.
12 qyrkúiekte ótken qoiylym tolyq anshlagpen ótip, Almatynyń mádeni ómirindegi aitýly oqiǵalardyń birine ainaldy. Teatr tarihynda alǵash ret áigili trilogiia balet tilimen jańasha interpretatsiialandy.
«AQBALA» spektaklinde tarihi ózgerister kezeńindegi adam taǵdyry, áieldiń mahabbaty men ana bolmysy, úmit pen qasiret, tańdaý men joǵaltý taqyryptary horeografiia, plastika jáne mýzyka arqyly jetkizildi. Qoiylymnyń mańyzdy kórkemdik jelileriniń biri — Aral teńiziniń qasireti.
Spektaklde balet trýppasy, simfoniialyq orkestr, opera solisteri men hor bir sahnada toǵysyp, kóne qazaq aspaby qylqobyzdyń úni qoiylymnyń atmosferasyn tolyqtyrdy.
Basty partiialardy Milana Rahimbekova (Aqbala), Arhat Áshirbek (Elaman) jáne Rústem Imanǵaliev (Táńibergen) oryndady.
Qoiylymnyń bas demeýshisi — Timýr Qulibaevtyń «HALYK» qaiyrymdylyq qory. «AQBALA» qazaq balet óneriniń kórnekti ókilderi Liýdmila Rýdakova men Edýard Malbekovtiń rýhyna arnaldy.
Teatr mýzeii jańa formatta ashyldy
Premera qarsańynda Abai atyndaǵy teatrdyń jańartylǵan interaktivti mýzeii de kórermenge esigin ashty. Munda teatr tarihy men onyń kórnekti tulǵalary týraly aqparat zamanaýi interaktivti formatta usynylǵan.
Mýzei qoryna teatr-sýretshiler mektebiniń negizin qalaýshylardyń biri Vladimir Kolodenkonyń balerinany beinelegen sirek kartinasy qosyldy. Týyndyny teatr hor ujymynyń ambassadory Zaýre Rozmat pen anasy Raziia Esenbaeva syiǵa tartty.
Osylaisha teatrdyń jańa maýsymy ulttyq ádebi murany balet ónerimen sabaqtastyrǵan «AQBALA» premerasymen jáne teatr tarihyn jańa formatta tanystyratyn jańartylǵan mýzeidiń ashylýymen bastaldy.
