Ál-Farabi atyndaǵy Qazaq ulttyq ýniversitetiniń jýrnalistika fakýltetinde uzaq jyldar eńbek etken belgili ǵalymdar men qalamgerlerdiń qyzmetten ketýi qoǵam nazaryn aýdardy, dep habarlaidy dalanews.kz.
Jýrnalistika fakýltetiniń ardager ustazdary Káken Qamzin, Temirǵali Kópbai, Murat Shaimaran jáne Ermahan Shaihy áleýmettik jeli arqyly jariialaǵan ashyq málimdemesinde fakýltettegi kadrlyq saiasatqa narazylyq bildirip, oqý ornynan ketetinderin málimdedi.
Olardyń aitýynsha, sońǵy jyldary fakýltette basqarýshylyq turaqsyzdyq kúsheiip, bes jyldyń ishinde bes dekan aýysqan. Ustazdar bul jaǵdai fakýltettiń ǵylymi jáne shyǵarmashylyq damýyna keri áser etkenin alǵa tartady.
Málimdeme avtorlarynyń qatarynda ondaǵan jyl boiy jýrnalist mamandardy daiarlap kelgen tájiribeli pedagogter bar. Atap aitqanda, filologiia ǵylymdarynyń doktory, professor Káken Qamzin fakýltette 32 jyl dáris bergen. Al aqyn, jýrnalist, ǵalym Temirǵali Kópbai 12 jyl, jazýshy-satirik Ermahan Shaihy men ádebiettanýshy Murat Shaimaran 20 jyldan astam ýaqyt bolashaq jýrnalisterdi oqytqan.
Ustazdar óz úndeýinde fakýltet basshylyǵyna qatysty pikirlerin ashyq aityp, kásibi ári bedeldi mamandardyń pikirine qulaq asylmaǵanyn jetkizdi. Sondai-aq olar joǵary oqý ornyndaǵy basqarý sheshimderiniń ashyqtyǵy men ádildigine qatysty máseleler kóterdi.
Ýniversitet málimdemesi
Óz kezeginde Ál-Farabi atyndaǵy QazUÝ atalǵan jaǵdaiǵa bailanysty resmi túsinikteme berdi. Ýniversitet málimetinshe, professor Káken Qamzin men dotsent Temirǵali Kópbaidyń eńbek sharttarynyń merzimi aiaqtalǵan. Al Ermahan Shaihy konkýrstyq komissiia rásimine qatysýdan bas tartqan bolsa, Murat Shaimaran akademiialyq talaptarǵa sáikestigin baǵalaý konkýrsynda qajetti nátijege qol jetkize almaǵan.
Ýniversitet ókilderi oqytýshylardy jumysqa qabyldaý jáne qyzmetin jalǵastyrý máselesi jyl saiyn ótkiziletin konkýrstyq rásimder arqyly júzege asyrylatynyn, barlyq sheshimder qoldanystaǵy zańnama men ishki normativtik qujattarǵa sáikes qabyldanatynyn atap ótti.
Degenmen qoǵamda talqylanyp jatqan basty másele – jýrnalistika salasynda mol tájiribe jinaqtaǵan, ondaǵan kitaptyń avtory atanǵan jáne birneshe býyn jýrnalisti tárbielegen bilikti mamandardyń joǵary oqý ornynan ketýi bolyp otyr. Sarapshylar mundai kadrlardyń ýniversitetten ketýi jýrnalistika biliminiń sapasyna jáne kásibi sabaqtastyqtyń saqtalýyna áser etýi múmkin ekenin aitýda.
Qazirgi tańda bul másele áleýmettik jelilerde qyzý talqylanyp, bilim berý qaýymdastyǵy arasynda túrli pikirler týǵyzýda.
