Memleket basshysy Qasym-Jomart Toqaev qazaqstandyqtardy Otbasy kúnimen quttyqtady. Prezident óz quttyqtaýynda otbasynyń qoǵam men memlekettiń damýyndaǵy mańyzdy róline toqtalyp, bala tárbiesine erekshe mán berý qajettigin atap ótti, dep habarlaidy dalanews.kz.
Qasym-Jomart Toqaevtyń aitýynsha, otbasy – ulttyń bolmysyn aiqyndaityn ári memleket pen qoǵamnyń damýyna tikelei yqpal etetin mańyzdy institýt.
«Ár azamattyń dúnietanymy, adami qasietteri qasterli qara shańyraǵynda qalyptasady. Ana júreginiń jylýy men ákeniń óristi ónegesi ár adamdy biik maqsattarǵa jeteleidi», – dedi Memleket basshysy.
Prezident úlkenderdiń danalyǵy men ómirlik tájiribesi jastarǵa baǵyt-baǵdar beretinin atap ótti. Onyń pikirinshe, otbasy arqyly salt-dástúr men ulttyq qundylyqtar urpaqtan urpaqqa jalǵasyp, halyqtyń mádeni jáne rýhani tutastyǵy nyǵaia túsedi.
Memleket basshysy 1 shildede zańdy kúshine engen Qazaqstan Respýblikasynyń jańa Konstitýtsiiasynda neke men otbasy, ana, áke jáne bala memlekettiń qorǵaýynda ekeni bekitilgenine nazar aýdardy. Sondai-aq Ata Zańda balalardyń quqyǵyn qorǵaýǵa jáne áiel men ananyń otbasyndaǵy rólin kúsheitýge basymdyq berilgenin aitty.
Prezident jańa Konstitýtsiiada alǵash ret «neke – er men áieldiń memleket zańǵa sáikes tirkegen erikti jáne teń quqyqty odaǵy» degen norma kórinis tapqanyn atap ótti. Budan bólek, biyl Otbasy máseleleri jónindegi ýákil institýty qurylǵanyn jetkizdi.
Qasym-Jomart Toqaev bala tárbiesine jaýapkershilikpen qaraý jáne óskeleń urpaqtyń jan-jaqty damýyna qolaily jaǵdai jasaý memlekettiń mańyzdy mindetteriniń biri ekenin aitty.
«Bul – adam kapitalyn nyǵaitýdyń, iaǵni elimizdiń áleýetin arttyrýdyń basty sharty», – dedi Prezident.
Memleket basshysy otansúigishtik, zań men tártipti saqtaý, tabiǵatty aialaý, qoǵamdyq oryndarda tazalyq saqtaý jáne ulttyq dástúrlerdi qurmetteý siiaqty qundylyqtar eń aldymen otbasyndaǵy tárbie arqyly qalyptasatynyn atap ótti.
«Bárimiz osy ortaq mindetke kúsh jumyldyrsaq, qoǵamda órkenietti elderge tán jańa etika qalyptastyramyz», – dedi Qasym-Jomart Toqaev.
Prezident Qazaqstannyń jasampaz ult retinde tarihi órleý dáýirine senimmen qadam basyp kele jatqanyn aityp, ár shańyraǵy baqytty ómir súretin Ádiletti Qazaqstandy birge qurýǵa bolatynyna senim bildirdi.
Sóz sońynda Memleket basshysy barsha qazaqstandyqtarǵa zor densaýlyq pen tolaiym tabys tiledi.
