Onyń aıtýynsha, Memleket basshysynyń bastamasymen elimizdegi saıası júıeni qaıta jańǵyrtý prosesi konstıtýsıalyq reformadan naqty bastaý aldy. Endigi mańyzdy qadam – Úkimettiń jańa quramyn jasaqtaý.
– «AMANAT» saılaýda kópshiliktiń daýysyna ıe bolyp jeńiske jetken partıa retinde búgin Premer-Mınıstr laýazymyna kandıdatýra usyndy. Mundaı tájirıbe Parlamenttiń rólin kúsheıtip qana qoımaı, saıası partıalardyń jaýapkershiligin arttyrady. Endigi kezekte Úkimettiń jumysy Fraksıa tarapynan jiti baqylaýda bolyp, onyń árbir sheshimi partıa ishinde suralatyn bolady. Bul jumys Májilistegi Fraksıanyń bedeli men onyń fýnksıonaldyq múmkindikterin keńeıtedi, – dedi partıa Fraksıasynyń jetekshisi.
Sondaı-aq, Elnur Beısenbaev qajet bolsa, partıa tıisti sharalar qoldanýǵa daıyn ekenin málimdedi.
– Bul – Prezıdent jarıalaǵan «Kúshti Prezıdent – yqpaldy Parlament – esep beretin Úkimet» qaǵıdatynyń naqty iske asýy dep bilemiz. Ras, sońǵy bir jylda Úkimetke qoǵam tarapynan aıtylǵan syn az bolǵan joq. Biraq, mınıstrler kabınetiniń nebári bir-aq jyl jumys istegenin eskerýimiz qajet. Bir jyl – úkimettiń jumysyn obektıvti baǵalaý úshin tym qysqa ýaqyt, – dedi Elnur Beısenbaev.
Sonymen qatar, ol elimizde baǵanyń turaqtamaýy, jumyssyzdyq, azamattardyń tabysyn arttyrý, jylýmen qamtamasyz etý, ınfraqurylymdy jaqsartý, aýyldy túletý sıaqty Úkimettiń aldynda asa aýqymdy mindetter turǵanyn atap ótti.
– Biz bul máselelerdi jaqsy bilemiz jáne ony Úkimetpen birge sheshýimiz qajet. Úkimetti jıi aýystyrǵannan máseleler sheshilýi bylaı tursyn, qordalana beretinin ýaqyt kórsetti. Sondyqtan, mınıstrler kabıneti byltyr bastaǵan isti jalǵastyryp, halyqtyń ál-aýqatyn arttyrý boıynsha jumysty tez arada shıratýy qajet, – dep túıindedi ol.
