Eýropalyq Odaq pen Ulybrıtanıa basshylary AQSH pen Reseı prezıdentteriniń kezdesýinen keıin birlesken málimdeme jasady, dep habarlaıdy Dalanews.kz.
Eýropalyq odaq Reseıge qarsy sanksıalyq qysymdy kúsheıte túsip, Ýkraınany ary qaraı da qoldaıtynyn málimdedi.
Eýropalyq odaq sanksıalardy kúsheıtýge múddeli
Olar Kıevke qarý-jaraq jetkizýdegi kez-kelgen shekteýlerdi tyıýǵa nıetti ekendikterin jáne Reseı Ýkraınanyń EO men NATO-ǵa kirýine tosqaýyl bolmaýy kerektigin atap ótti. Ýkraına "qaýipsizdiktiń senimdi kepiline" ıe bolýy kerek, al onyń Qarýly Kúshteri "eshqandaı shekteýlerge ushyramaýy tıis".
Sondaı-aq, Ýkraına Reseımen qaqtyǵysty retteý aıasynda óz terıtorıasyna qatysty sheshimdi ózi qabyldaýy kerektigi de basa aıtylady.
Tramp beıbit kelisiminen úmitti
AQSH prezıdenti Donald Tramp Truth Social-daǵy paraqshasynda Aláskada Vladımır Pýtınmen ótken kezdesý, sondaı-aq Vladımır Zelenskıımen jáne eýropalyq elderdiń kóshbasshylarmen bolǵan áńgimeden keıingi óz oıymen bólisip, jelidegi paraqshasynda jazba jarıalady.
"Aláskadaǵy keremet jáne óte sátti kún! Reseı prezıdenti Vladımır Pýtınmen kezdesý de, sondaı-aq Ýkraına prezıdenti Zelenskıımen jáne ártúrli eýropalyq elder kóshbasshylarmen, sonyń ishinde NATO-nyń qurmetti Bas hatshysymen bolǵan keshqurym ýaqyttaǵy telefon arqyly áńgimemiz de óte jaqsy ótti", - dep jazdy AQSH prezıdenti.
Aq úıdiń basshysy barlyq tarap beıbit kelisimge kelý kerek degen bir pikirge kelgenin atap ótti.
"Barlyǵy Reseı men Ýkraına arasyndaǵy jantúrshigerlik soǵysty toqtatýdyń eń utymdy tásili, kóbinese oryndala bermeıtin atysty doǵarý týraly kelisim emes, soǵysty toqtatatyn tikeleı beıbit kelisimin jasaý dep kelisti", - dep atap ótti Tramp.
Sondaı-aq, ol Vladımır Zelenskııdiń 18 tamyzda Vashıngtonǵa keletinin aıtty.
"Eger bári oıdaǵydaı ótse, biz prezıdent Pýtınmen kezdesýimizdi josparlaımyz. Bul mıllıondaǵan adamdardyń ómirin saqtap qalýy múmkin. Osy máselege nazar aýdarǵandaryńyz úshin raqmet!", dep jazdy Donald Tramp.
Zelenskıı kelissózderdiń barlyq kezeńderinde eýropalyq áriptesteriniń bolýyna múddeli
Ýkraına prezıdenti Vladımır Zelenskıı de 2025 jyldyń 18 tamyzynda Vashıngtoǵa baratynyn rastady.
Bul týraly Ýkraına basshysy AQSH prezıdentimen sóıleskennen keıin Telegram arnasynda málimdedi. Ol Reseımen aradaǵy atysty doǵarý jaıyn talqylaýdy josparlap otyrǵanyn da atap ótti.
Zelenskıı Tramppen aldymen jekeleı, sodan keıin Eýropalyq kóshbasshylardyń qatysýymen sóıleskenin jetkizdi. Áńgime 1,5 saǵattan astam ýaqytqa sozyldy. Tramp Zelenskııge Reseı prezıdenti Vladımır Pýtınmen Aláskadaǵy kezdesýi jáne aradaǵy áńgimeniń negizgi bólikteri týraly habarlaǵan.
"Ýkraına beıbitshilik úshin barynsha ónimdi jumys isteýge daıyn ekenin taǵy da rastaıdy", - dep atap ótti Zelenskıı óz jazbasynda.
Sondaı-aq ol Tramptyń Ýkraına, AQSH jáne Reseı Federasıasy basshylarynyń úshjaqty samıtin ótkizý týraly usynysyn qoldaıtynyn málimdedi. Ol kelissózderdiń barlyq kezeńderinde eýropalyq áriptesterdiń bolýynyń mańyzdy ekenin de atap ótti.
Buǵan deıin Tramp pen Pýtınniń Aláskadaǵy kelissózderiniń qorytyndysy jarıalanǵanyn jazǵanbyz. Sondaı-aq bul kezdesýge qatysty saıasattanýshylar qandaı oıda ekenin de jetkizgen edik. Qazaqstan Reseı men AQSH prezıdentteriniń Ankorıdjdegi kezdesýin Ýkraına boıynsha eń joǵary deńgeıdegi kelissózder úderisiniń bastamasy retinde quptaıdy.
