Áleýmettik jelide Almatydaǵy tergeý izoliatorynda eks-sýdianyń jan tapsyrǵany týraly aqparat tarady, dep habarlaidy Dalanews.kz.
Telegram-daǵy Kozachkov offside arnasynda Almatydaǵy tergeý izoliatorynda kóz jumǵan ákimshilik quqyq buzýshylyq isteri jónindegi mamandandyrylǵan aýdanaralyq sotynyń sýdiasy ekeni aitylady. Ondaǵy derekke súiensek, marqum shamamen bir jyl buryn, 2024 jyldyń qazan aiynda "para aldy jáne alaiaqtyq jasady" degen kúdikpen ustalǵan. Derekkóz málimetinshe, oǵan jolyǵýǵa túski astan keiin qoǵamdyq qorǵaýshy - ákesi kelgen.
"Sýdiany qabyldaý bólmesine alyp barǵanda ol ózin nashar sezingen. Oqiǵa ornynda oǵan alǵashqy meditsinalyq kómek kórsetilip, jedel járdem qyzmeti shaqyrylǵan. Shuǵyl jetken aq halattylar onyń qaitys bolǵanyn rastady. Ólimniń aldyn ala sebebi - júrektiń toqtaýy", delingen habarlamada.
Quzyrly organ da tergeý izoliatorynda qamaýǵa alynǵan er adamnyń shynymen de kenetten qaitys bolǵanyn rastady.
"Ólimniń aldyn ala sebebi - jedel júrek jetkiliksizdigi. Ólim sáti beinebaqylaý kamerasyna jazylyp qalǵan. Tergeý sharalary júrgizilýde", dep QR IIM Qylmystyq atqarý júiesi departamenti NUR.KZ tilshisine túsinikteme bergen.
Buǵan deiin Atyraý munai óńdeý zaýytynyń burynǵy bas direktory Murat Dosmuratovtyń qaitys bolǵanyn jazǵanbyz. Aldyn ala derekter boiynsha, ol júrek talmasynan kóz jumǵan.
