الەۋمەتتىك جەلىدە الماتىداعى تەرگەۋ يزولياتورىندا ەكس-سۋديانىڭ جان تاپسىرعانى تۋرالى اقپارات تارادى، دەپ حابارلايدى Dalanews.kz.
Telegram-داعى Kozachkov offside ارناسىندا الماتىداعى تەرگەۋ يزولياتورىندا كوز جۇمعان اكىمشىلىك قۇقىق بۇزۋشىلىق ىستەرى جونىندەگى مامانداندىرىلعان اۋدانارالىق سوتىنىڭ سۋدياسى ەكەنى ايتىلادى. ونداعى دەرەككە سۇيەنسەك، مارقۇم شامامەن ءبىر جىل بۇرىن، 2024 جىلدىڭ قازان ايىندا "پارا الدى جانە الاياقتىق جاسادى" دەگەن كۇدىكپەن ۇستالعان. دەرەككوز مالىمەتىنشە، وعان جولىعۋعا تۇسكى استان كەيىن قوعامدىق قورعاۋشى - اكەسى كەلگەن.
"سۋديانى قابىلداۋ بولمەسىنە الىپ بارعاندا ول ءوزىن ناشار سەزىنگەن. وقيعا ورنىندا وعان العاشقى مەديسينالىق كومەك كورسەتىلىپ، جەدەل جاردەم قىزمەتى شاقىرىلعان. شۇعىل جەتكەن اق حالاتتىلار ونىڭ قايتىس بولعانىن راستادى. ءولىمنىڭ الدىن الا سەبەبى - جۇرەكتىڭ توقتاۋى"، دەلىنگەن حابارلامادا.
قۇزىرلى ورگان دا تەرگەۋ يزولياتورىندا قاماۋعا الىنعان ەر ادامنىڭ شىنىمەن دە كەنەتتەن قايتىس بولعانىن راستادى.
"ءولىمنىڭ الدىن الا سەبەبى - جەدەل جۇرەك جەتكىلىكسىزدىگى. ءولىم ءساتى بەينەباقىلاۋ كامەراسىنا جازىلىپ قالعان. تەرگەۋ شارالارى جۇرگىزىلۋدە"، دەپ ق ر ءىىم قىلمىستىق اتقارۋ جۇيەسى دەپارتامەنتى NUR.KZ تىلشىسىنە تۇسىنىكتەمە بەرگەن.
بۇعان دەيىن اتىراۋ مۇناي وڭدەۋ زاۋىتىنىڭ بۇرىنعى باس ديرەكتورى مۇرات دوسمۇراتوۆتىڭ قايتىس بولعانىن جازعانبىز. الدىن الا دەرەكتەر بويىنشا، ول جۇرەك تالماسىنان كوز جۇمعان.
