Almaty qalasynyń máslihaty "2025 jylǵa arnalǵan kondominiým obektisin basqarý jáne ortaq múlikti kútip-ustaý shyǵyndarynyń eń tómengi mólsherin bekitý týraly" sheshim jobasyn daiyndady, dep habarlaidy Dalanews.kz.
Jobaǵa sáikes, jańa eń tómengi tarif retinde 1 sharshy metr úshin 40 teńge belgilengen. Bul ózgeris qyzmetkerlerdiń jalaqysy men taýarlar qunynyń ósýin, sondai-aq kóppáterli úilerdiń ortaq múlkiniń qazirgi jai-kúiin eskere otyryp usynylyp otyr. Negizdemede 2023 jyldan bastap aýlalardy kútip-ustaý jergilikti biýdjet esebinen qarjylandyrylatyny, al kúrdeli jóndeý shyǵyndary turǵyndardyń jeke jinaq shottarynan júrgiziletini aitylǵan.
Túsindirme qujatta turǵyn úidi basqarý men ortaq múlikti ustaý shyǵyndaryna eńbekaqy, bank qyzmetteri, dezinfektsiia men deratizatsiia jumystary, sondai-aq mindetti tólemder kiretini kórsetilgen.
Buǵan deiin eń tómengi tarif 1 sharshy metr úshin 25 teńge kóleminde belgilenip, bir jylǵa bekitilgen bolatyn. Jumys toby infliatsiia deńgeiin eskere otyryp, tarifti qaita eseptedi: sońǵy 14 jylda infliatsiia jylyna orta eseppen 7%-dy quraǵan.
2025 jylǵa arnalǵan eń tómengi tarifti 1 sharshy metr úshin 40 teńge deńgeiinde bekitý usynylǵan. Bul qujat 5 jeltoqsanǵa deiin qoǵamdyq talqylaýǵa "Ashyq NQA" saitynda qoljetimdi bolady.
Aita ketsek, buǵan deiin Almatydaǵy PIK qaýymdastyǵy turǵyn úilerdi basqarý jáne ustaý boiynsha minimaldy tarifti qaita qaraý týraly bastama kótergen bolatyn.
