الماتى قالاسىنىڭ ءماسليحاتى "2025 جىلعا ارنالعان كوندومينيۋم وبەكتىسىن باسقارۋ جانە ورتاق مۇلىكتى كۇتىپ-ۇستاۋ شىعىندارىنىڭ ەڭ تومەنگى مولشەرىن بەكىتۋ تۋرالى" شەشىم جوباسىن دايىندادى، دەپ حابارلايدى Dalanews.kz.
جوباعا سايكەس، جاڭا ەڭ تومەنگى تاريف رەتىندە 1 شارشى مەتر ءۇشىن 40 تەڭگە بەلگىلەنگەن. بۇل وزگەرىس قىزمەتكەرلەردىڭ جالاقىسى مەن تاۋارلار قۇنىنىڭ ءوسۋىن، سونداي-اق كوپپاتەرلى ۇيلەردىڭ ورتاق مۇلكىنىڭ قازىرگى جاي-كۇيىن ەسكەرە وتىرىپ ۇسىنىلىپ وتىر. نەگىزدەمەدە 2023 جىلدان باستاپ اۋلالاردى كۇتىپ-ۇستاۋ جەرگىلىكتى بيۋدجەت ەسەبىنەن قارجىلاندىرىلاتىنى، ال كۇردەلى جوندەۋ شىعىندارى تۇرعىنداردىڭ جەكە جيناق شوتتارىنان جۇرگىزىلەتىنى ايتىلعان.
تۇسىندىرمە قۇجاتتا تۇرعىن ءۇيدى باسقارۋ مەن ورتاق مۇلىكتى ۇستاۋ شىعىندارىنا ەڭبەكاقى، بانك قىزمەتتەرى، دەزينفەكسيا مەن دەراتيزاسيا جۇمىستارى، سونداي-اق مىندەتتى تولەمدەر كىرەتىنى كورسەتىلگەن.
بۇعان دەيىن ەڭ تومەنگى تاريف 1 شارشى مەتر ءۇشىن 25 تەڭگە كولەمىندە بەلگىلەنىپ، ءبىر جىلعا بەكىتىلگەن بولاتىن. جۇمىس توبى ينفلياسيا دەڭگەيىن ەسكەرە وتىرىپ، ءتاريفتى قايتا ەسەپتەدى: سوڭعى 14 جىلدا ينفلياسيا جىلىنا ورتا ەسەپپەن 7%-دى قۇراعان.
2025 جىلعا ارنالعان ەڭ تومەنگى ءتاريفتى 1 شارشى مەتر ءۇشىن 40 تەڭگە دەڭگەيىندە بەكىتۋ ۇسىنىلعان. بۇل قۇجات 5 جەلتوقسانعا دەيىن قوعامدىق تالقىلاۋعا "اشىق نقا" سايتىندا قولجەتىمدى بولادى.
ايتا كەتسەك، بۇعان دەيىن الماتىداعى پيك قاۋىمداستىعى تۇرعىن ۇيلەردى باسقارۋ جانە ۇستاۋ بويىنشا مينيمالدى ءتاريفتى قايتا قاراۋ تۋرالى باستاما كوتەرگەن بولاتىن.
