Almatyda jumbaq jaǵdaida qaitys bolǵan Aqnár Gúlstannyń anasy men advokaty baspasóz máslihatynda qyzdyń ólimine qatysty jańa derekterdi jariialap, bul istiń qasaqana jasalǵan qylmys ekenin dáleldeitin beinematerialdar bar ekenin málimdedi, dep habarlaidy Dalanews.kz.
Advokat Inga Imanbaidyń aitýynsha, 2024 jyly 12 sáýirde Aqnárdi bir azamat páterde zańsyz ustap, oǵan psihologiialyq jáne seksýaldyq zorlyq-zombylyq kórsetken. Bul oqiǵa beinejazbaǵa túsirilgen.
“Aqnárǵa qatysty taǵy bir derek anyqtaldy. 12 sáýir kúni ol bir azamattyń páterinde zańsyz túrde ustalyp, oǵan psihologiialyq ári seksýaldyq qysym jasalǵan. Bul oqiǵa beinejazba arqyly tirkelgen. Biz bul jazbany mindetti túrde tergeý organdaryna tapsyramyz. Jazbany mynadai baptar boiynsha saraptaýdy suraimyz: zańsyz bas bostandyǵynan aiyrý, zorlyqsyz seksýaldyq sipattaǵy áreketter, ózin-ózi óltirýge itermeleý, ar-namysty qorlaý men taptaý, bótenniń jeke zattaryn zańsyz ielený”, — dedi advokat.
Beinejazbada Aqnárdiń páterden ketýge tyrysyp jatqany, biraq oǵan fizikalyq kúsh qoldanylyp, ketýge múmkindik berilmegeni kórinedi. Sonymen qatar oǵan seksýaldyq sipattaǵy áreketter jasalyp, ar-namysy men qadir-qasieti qorlanǵan.
“Onyń kelisiminsiz denesine, intimdik jerlerine qol tigizgen. “Sekir” degen sózdermen jáne ashyq turǵan tereze arqyly psihologiialyq qysym kórsetilgen. Ar-namysyna til tigizip, dóreki sózder aitylǵan. Telefony men sómkesi de qaitarylmaǵan. Ol ketkisi kelip turǵany beinejazbada anyq kórinedi.
Budan bólek, tańǵy saǵat úsh kezinde álgi eki qyzdyń janynda advokat bolǵany anyqtaldy. Bul jait ta kóp suraq týyndatady”, — dedi Inga Imanbai.
Baspasóz máslihatynda Aqnárdiń anasy men advokaty bul qylmystyń aldyn ala josparlanǵanyn jáne qasaqana jasalǵanyn dáleldeitin jańa materialdardy usyndy. Olar beinejazbada kórinetin bir er adamnyń eki qyzben birge áreket etip, qylmysqa qatysy bar bolýy múmkin ekenin aitty. Bul eki qyz Aqnárdyń ólimine bailanysty tergeý barysynda kýáger retinde tanylǵan.
Buǵan deiin, osy is boiynsha tergeý júrgizilip jatqan kezde, Aqnárdyń ólimine qatysty eki qyzdyń qorǵaýshylary onyń ózin-ózi óltirýge beiim bolǵanyn jáne olar ony tynyshtandyrýǵa tyrysqanyn málimdegen bolatyn. Alaida Aqnardyń anasy men advokaty bul aqparatty joqqa shyǵaryp, ony jalǵan dep atady.
Eske salaiyq, Almatyda 2024 jyly 20 shildede Aqnár Hamit kópqabatty turǵyn úidiń jetinshi qabatynan qulap, qaitys bolǵan. Tergeý bul oqiǵany "ózin-ózi óltirý" babymen tirkegen. Alaida jaqyndary Aqnárdiń jetinshi qabattan qulap ketkenine senbeidi. Olardyń sózinshe, marqum qaza tapqanǵa deiin denesinde azaptaý belgileri bolǵan.
Keiinirek marqumnyń anasy Gúlstan Qamit Almaty qalalyq tergeý organdary men prokýratýrasy bul isti jeńil bappen ózine ózi qol jumsaýǵa itermeleý dep baǵalap, shynaiy tergeý júrgizbei otyrǵanyn málimdedi.
Al Almaty qalalyq PD málimetinshe, tergeý basqarmasy byltyr shildede Almaty turǵynynyń ólimine qatysty qylmystyq is qozǵaǵan.
Osyǵan bailanysty Aqnár Gúlstannyń isi boiynsha jábirlenýshi taraptyń advokaty, zańger Inga Imanbai málimdeme jasaǵan edi.
Onyń sózinshe, million adam ádildikti kútip otyrǵanda tergeýshi demalysta júr.
"Aqnár Gúlstannyń ólimine qatysty qylmystyq is qozǵalǵanyna on ai boldy. Biraq naqty nátijege áli kúnge deiin qoljetkizilgen joq. Quqyqtyq turǵydan bul isti qorǵaýyma alyp, eki apta buryn-aq Aqnárdiń anasy Gúlstan Qamit atynan senimhat jiberip, tergeýshiden tergeý materialdarymen tanysýdy suradym. Maqsatym – dáleldemelermen tanysyp, qajet bolǵan jaǵdaida qosymsha ótinishter daiyndap, tergeýge belsendi qatysý. Alaida arada eki apta ótti, tergeýshiden jaýap bolmady. Búgin habarlasqanymda, tergeýshi eńbek demalysynda ekenin jáne taǵy eki aptadan keiin ǵana kelýimdi surady. Iaǵni tergeý materialdaryn kórý múmkindigi maǵan tek bir ai ótken soń berilýi múmkin. Bul ýaqytta milliondaǵan adam ádildik surap otyr. Al tergeýshi demalysta", - dedi ol.
Inga Imanbai bul jaǵdaidy tergeýdiń formaldy júrgizilýiniń, isti sozýdyń, qoǵamnyń suranysyna beijai qaraýdyń aiǵaǵy dep qabyldaityndaryn jetkizdi.
"Sondyqtan biz Astanadan: Aqnár Gúlstan isiniń tergelýin tikelei baqylaýǵa alýdy; Isti arnaiy tergeý tobyna berýdi; Qazirgi tergeý barysyna táýelsiz baǵa berýdi talap etemiz. Ádildik kúte turýǵa bolatyn nárse emes. Ásirese, adam ómiri qiylǵan aýyr qylmysta", - dedi ol.
