Тағы бір жантүршігерлік қылмыс: Ақнәр Хамиттің жақындары әділдікті талап етті

Сағыныш Сардарова 16 мам. 2025 16:51 890

Алматыда былтыр жетінші қабаттан құлап көз жұмған Ақнәр Хамиттің туыстары оның өліміне қатысты тергеу әділетсіз жүргізіліп жатқанын айтып, шағымданды, деп хабарлайды Dalanews.kz.

Алматыда 2024 жылы 20 шілдеде Ақнәр Хамит көпқабатты тұрғын үйдің жетінші қабатынан құлап, қайтыс болған. Тергеу бұл оқиғаны "өзін-өзі өлтіру" бабымен тіркеген. Алайда жақындары Ақнәрдің жетінші қабаттан құлап кеткеніне сенбейді. Олардың сөзінше, марқұм қаза болғанға дейін денесінде азаптау белгілері болған.

"Бірақ полиция тергеу кезінде оны іс материалдарына қоспаған" дейді олар.

Алматы тұрғыны Гүлістан Хамит былтыр биіктен құлап көз жұмған қызы Ақнәрдің қазасын тергеуді жеделдетуді сұрайды. Ол "Ақнәрді таныс қыздары әбден азаптап, жетінші қабаттан лақтырып жіберген" дейді. Оқиғадан бері бір жылға жуық уақыт өтсе де күдікті жоқ.

14 мамырда Алматы қалалық Полиция департамент іс "ерекше бақылауда" деп хабарлады.

Ақнәр Хамит Қытайдан Қазақстанға көшіп келген отбасынан шыққан, өнерлі әрі білімді бойжеткен болған. Ол КИМЭП университетінде оқыған, бірнеше шет тілін меңгеріп, халықаралық компанияларда жұмыс істеген. Музыка мен кино саласында да танылған. Белсенді, арманы асқақ, еңбекқор қыз болғанын достары мен ұстаздары еске алады.

Қайғыдан қан жұтқан анасы Ақнәрдің өліміне байланысты қылмыстық істің "Өзін-өзі өлтіруге жеткізу" емес, "Адам өлтіру" және "Азаптау" баптары бойынша қайта саралануын талап етіп отыр. Ол ІІМ-ге, Бас прокуратураға, Президент әкімшілігіне бірнеше мәрте хат жолдап, істің әділ қаралуын сұраған.