الماتىدا جۇمباق جاعدايدا قايتىس بولعان ءاقنار گۇلستاننىڭ اناسى مەن ادۆوكاتى باسپا ءسوز ءماسليحاتىندا قىزدىڭ ولىمىنە قاتىستى جاڭا دەرەكتەردى جاريالاپ، بۇل ءىستىڭ قاساقانا جاسالعان قىلمىس ەكەنىن دالەلدەيتىن بەينەماتەريالدار بار ەكەنىن مالىمدەدى، دەپ حابارلايدى Dalanews.kz.
ادۆوكات ينگا يمانبايدىڭ ايتۋىنشا، 2024 جىلى 12 ساۋىردە ءاقناردى ءبىر ازامات پاتەردە زاڭسىز ۇستاپ، وعان پسيحولوگيالىق جانە سەكسۋالدىق زورلىق-زومبىلىق كورسەتكەن. بۇل وقيعا بەينەجازباعا تۇسىرىلگەن.
“ءاقنارعا قاتىستى تاعى ءبىر دەرەك انىقتالدى. 12 ءساۋىر كۇنى ول ءبىر ازاماتتىڭ پاتەرىندە زاڭسىز تۇردە ۇستالىپ، وعان پسيحولوگيالىق ءارى سەكسۋالدىق قىسىم جاسالعان. بۇل وقيعا بەينەجازبا ارقىلى تىركەلگەن. ءبىز بۇل جازبانى مىندەتتى تۇردە تەرگەۋ ورگاندارىنا تاپسىرامىز. جازبانى مىناداي باپتار بويىنشا ساراپتاۋدى سۇرايمىز: زاڭسىز باس بوستاندىعىنان ايىرۋ، زورلىقسىز سەكسۋالدىق سيپاتتاعى ارەكەتتەر، ءوزىن-وزى ولتىرۋگە يتەرمەلەۋ، ار-نامىستى قورلاۋ مەن تاپتاۋ، بوتەننىڭ جەكە زاتتارىن زاڭسىز يەلەنۋ”، — دەدى ادۆوكات.
بەينەجازبادا ءاقناردىڭ پاتەردەن كەتۋگە تىرىسىپ جاتقانى، ءبىراق وعان فيزيكالىق كۇش قولدانىلىپ، كەتۋگە مۇمكىندىك بەرىلمەگەنى كورىنەدى. سونىمەن قاتار وعان سەكسۋالدىق سيپاتتاعى ارەكەتتەر جاسالىپ، ار-نامىسى مەن قادىر-قاسيەتى قورلانعان.
“ونىڭ كەلىسىمىنسىز دەنەسىنە، ينتيمدىك جەرلەرىنە قول تيگىزگەن. “سەكىر” دەگەن سوزدەرمەن جانە اشىق تۇرعان تەرەزە ارقىلى پسيحولوگيالىق قىسىم كورسەتىلگەن. ار-نامىسىنا ءتىل تيگىزىپ، دورەكى سوزدەر ايتىلعان. تەلەفونى مەن سومكەسى دە قايتارىلماعان. ول كەتكىسى كەلىپ تۇرعانى بەينەجازبادا انىق كورىنەدى.
بۇدان بولەك، تاڭعى ساعات ءۇش كەزىندە الگى ەكى قىزدىڭ جانىندا ادۆوكات بولعانى انىقتالدى. بۇل جايت تا كوپ سۇراق تۋىنداتادى”، — دەدى ينگا يمانباي.
باسپا ءسوز ءماسليحاتىندا ءاقناردىڭ اناسى مەن ادۆوكاتى بۇل قىلمىستىڭ الدىن الا جوسپارلانعانىن جانە قاساقانا جاسالعانىن دالەلدەيتىن جاڭا ماتەريالداردى ۇسىندى. ولار بەينەجازبادا كورىنەتىن ءبىر ەر ادامنىڭ ەكى قىزبەن بىرگە ارەكەت ەتىپ، قىلمىسقا قاتىسى بار بولۋى مۇمكىن ەكەنىن ايتتى. بۇل ەكى قىز ءاقناردىڭ ولىمىنە بايلانىستى تەرگەۋ بارىسىندا كۋاگەر رەتىندە تانىلعان.
بۇعان دەيىن، وسى ءىس بويىنشا تەرگەۋ جۇرگىزىلىپ جاتقان كەزدە، ءاقناردىڭ ولىمىنە قاتىستى ەكى قىزدىڭ قورعاۋشىلارى ونىڭ ءوزىن-وزى ولتىرۋگە بەيىم بولعانىن جانە ولار ونى تىنىشتاندىرۋعا تىرىسقانىن مالىمدەگەن بولاتىن. الايدا اقناردىڭ اناسى مەن ادۆوكاتى بۇل اقپاراتتى جوققا شىعارىپ، ونى جالعان دەپ اتادى.
ەسكە سالايىق، الماتىدا 2024 جىلى 20 شىلدەدە ءاقنار حاميت كوپقاباتتى تۇرعىن ءۇيدىڭ جەتىنشى قاباتىنان قۇلاپ، قايتىس بولعان. تەرگەۋ بۇل وقيعانى "ءوزىن-وزى ءولتىرۋ" بابىمەن تىركەگەن. الايدا جاقىندارى ءاقناردىڭ جەتىنشى قاباتتان قۇلاپ كەتكەنىنە سەنبەيدى. ولاردىڭ سوزىنشە، مارقۇم قازا تاپقانعا دەيىن دەنەسىندە ازاپتاۋ بەلگىلەرى بولعان.
كەيىنىرەك مارقۇمنىڭ اناسى گۇلستان قاميت الماتى قالالىق تەرگەۋ ورگاندارى مەن پروكۋراتۋراسى بۇل ءىستى جەڭىل باپپەن وزىنە ءوزى قول جۇمساۋعا يتەرمەلەۋ دەپ باعالاپ، شىنايى تەرگەۋ جۇرگىزبەي وتىرعانىن مالىمدەدى.
ال الماتى قالالىق پد مالىمەتىنشە، تەرگەۋ باسقارماسى بىلتىر شىلدەدە الماتى تۇرعىنىنىڭ ولىمىنە قاتىستى قىلمىستىق ءىس قوزعاعان.
وسىعان بايلانىستى ءاقنار گۇلستاننىڭ ءىسى بويىنشا جابىرلەنۋشى تاراپتىڭ ادۆوكاتى، زاڭگەر ينگا يمانباي مالىمدەمە جاساعان ەدى.
ونىڭ سوزىنشە، ميلليون ادام ادىلدىكتى كۇتىپ وتىرعاندا تەرگەۋشى دەمالىستا ءجۇر.
"ءاقنار گۇلستاننىڭ ولىمىنە قاتىستى قىلمىستىق ءىس قوزعالعانىنا ون اي بولدى. ءبىراق ناقتى ناتيجەگە ءالى كۇنگە دەيىن قولجەتكىزىلگەن جوق. قۇقىقتىق تۇرعىدان بۇل ءىستى قورعاۋىما الىپ، ەكى اپتا بۇرىن-اق ءاقناردىڭ اناسى گۇلستان قاميت اتىنان سەنىمحات جىبەرىپ، تەرگەۋشىدەن تەرگەۋ ماتەريالدارىمەن تانىسۋدى سۇرادىم. ماقساتىم – دالەلدەمەلەرمەن تانىسىپ، قاجەت بولعان جاعدايدا قوسىمشا وتىنىشتەر دايىنداپ، تەرگەۋگە بەلسەندى قاتىسۋ. الايدا ارادا ەكى اپتا ءوتتى، تەرگەۋشىدەن جاۋاپ بولمادى. بۇگىن حابارلاسقانىمدا، تەرگەۋشى ەڭبەك دەمالىسىندا ەكەنىن جانە تاعى ەكى اپتادان كەيىن عانا كەلۋىمدى سۇرادى. ياعني تەرگەۋ ماتەريالدارىن كورۋ مۇمكىندىگى ماعان تەك ءبىر اي وتكەن سوڭ بەرىلۋى مۇمكىن. بۇل ۋاقىتتا ميلليونداعان ادام ادىلدىك سۇراپ وتىر. ال تەرگەۋشى دەمالىستا"، - دەدى ول.
ينگا يمانباي بۇل جاعدايدى تەرگەۋدىڭ فورمالدى جۇرگىزىلۋىنىڭ، ءىستى سوزۋدىڭ، قوعامنىڭ سۇرانىسىنا بەيجاي قاراۋدىڭ ايعاعى دەپ قابىلدايتىندارىن جەتكىزدى.
"سوندىقتان ءبىز استانادان: ءاقنار گۇلستان ءىسىنىڭ تەرگەلۋىن تىكەلەي باقىلاۋعا الۋدى؛ ءىستى ارنايى تەرگەۋ توبىنا بەرۋدى؛ قازىرگى تەرگەۋ بارىسىنا تاۋەلسىز باعا بەرۋدى تالاپ ەتەمىز. ادىلدىك كۇتە تۇرۋعا بولاتىن نارسە ەمەس. اسىرەسە، ادام ءومىرى قيىلعان اۋىر قىلمىستا"، - دەدى ول.
