Áleýmettik jelide Almaty men Taldyqorǵan arasyndaǵy jerasty jaryqtary boiynda degazatsiia kúsheiip, Ystyqkól ústinde erekshe bulttar paida bolǵany týraly aqparat tarady. Jazba avtory muny jaqyn arada bolýy múmkin jer dúmpýiniń belgisi retinde atap kórsetedi. Alaida Halyqaralyq aqparattyq tehnologiialar ýniversitetiniń PhD doktory, Ionosfera institýtynyń jetekshi ǵylymi qyzmetkeri Marat Nurtas bul málimdemeni joqqa shyǵaryp, dúrligýge negiz joq ekenin málimdedi, dep habarlaidy Dalanews.kz.
Jazbada ne aitylǵan?
Svetlana Drýjinina esimdi jeli qoldanýshysy óz jazbasynda jer silkinisine qatysty boljamyn ortaǵa salǵan.
“Búgingi lentany paraqtaý bir ǵanibet — eshkimdi eshnárse alańdatpaidy. Biraq sonyń arasynda bir maza bermei júrgen oidy aitqym keledi”, – deidi ol.
Jeli qoldanýshysy kez kelgen jer silkinisiniń aldynda jer astynan gaz bóliný (degazatsiia) júretinin, bul qubylys seismotektonikalyq bulttar arqyly baiqalatynyn aitady. Mundai bulttar kóp jaǵdaida jaqyn arada bolatyn jer silkinisiniń belgisi bolýy múmkin. Avtordyń paiymdaýynsha, bulttardyń aýmaǵy neǵurlym keń bolsa, zilzalanyń qýaty da soǵurlym joǵary bolady. Al bulttar paida bolǵannan bastap jer silkinisi oryn alǵanǵa deiin birneshe saǵattan 10 kúnge deiingi ýaqyt ótýi múmkin.
“Qazirgi tańda Kemin jáne Almaty mańyndaǵy jerasty jaryqtary boiynda degazatsiia kúsheiip keledi. Bul qubylys Taldyqorǵanǵa deiin baiqalýda”, – dep jazady Drýjinina.
Sondai-aq ol Ystyqkóldiń ústinde “gerold” dep atalatyn erekshe pishindegi bulttardyń paida bolǵanyn atap ótken. Bul da avtordyń pikirinshe, jer silkinisiniń jaqyndaýynyń belgisi bolýy yqtimal.
Jazba áleýmettik jeli qoldanýshylary arasynda túrli pikir týdyrdy. Biri ony ǵylymi boljam dep qabyldasa, endi biri jai ǵana úrei týǵyzatyn aqparat retinde synǵa aldy.
Qarashadaǵy jer silkinisin dál boljaǵan maman atalaǵan aqparatqa qatysty túsinikteme berdi
Ionosfera institýtynyń jetekshi ǵylymi qyzmetkeri Marat Nurtastyń aitýynsha, qazirgi ýaqytta Almaty mańynda eshqandai erekshe qubylys baiqalmaidy.
“Áleýmettik jelidegi derekter Shyǵys Qazaqstan, Semei nemese Óskemen óńirine qatysty bolýy múmkin. Biraq ondaǵy dabyl da asa kúshti jer silkinisin kórsetip turǵan joq”, – dedi ol.
Ǵalymnyń bul pikirine súiensek, áleýmettik jelide taraǵan aqparattyń ǵylymi negizi naqty dáleldenbegen. Degenmen mamandar árdaiym resmi kózder men seismologiialyq ortalyqtardyń eskertýine qulaq asýǵa keńes beredi.
Aita keteiik, 5 qarashada Almatyda 3 baldyq jerasty dúmpýi tirkeldi. Bul jaǵdai turǵyndardyń úreiin alyp, tótenshe jaǵdaiǵa daiyndyq máselesin qaita eske saldy. Osyǵan bailanysty Marat Nurtas jer silkinisi qaýpin baǵalap, aldaǵy ýaqytta bolýy múmkin seismikalyq belsendilikti boljaý úshin arnaiy zertteý júrgizgenin málimdegen edi.
Naýryz aiynda Dalanews.kz agenttigi Marat Nurtastyń tabiǵi qubylysqa bailanysty pikirin suraǵan bolatyn. Qoǵamda keńinen talqyǵa túsken bul suqbatta zertteýshi halyqty kóktem jáne kúz ailarynda erekshe saq bolýǵa shaqyrǵan edi.
