Álemdik arenada elimizdiń atyn asqaqtatyp júrgen “Samruq” robototehnika komandasy AQSh-ta ótetin VEX Robotics World Championship 2026 álem chempionatyna joldama aldy. Alaida talaidy shań qaptyrǵan órenderimizdiń muhit asýyna qarjy tapshylyǵy qolbailaý bolyp tur. Tórt jyldyq eńbek pen mańdai terdiń óteýi - demeýshilerdiń qoldaýyna tikelei bailanysty. Bul týraly komanda jetekshisi Janel Ýrazkanova Dalanews.kz redaktsiiasyna málimdedi.
Jeńispen órilgen jol
Janel Ýrazkanova bastaǵan segiz ónertapqyshtyń robototehnika salasynda júrgenine tórt jyldyń júzi bolǵan.
Osy ýaqyt ishinde komanda birqatar halyqaralyq jáne ulttyq jarystarda joǵary nátije kórsetken.
Máselen, 2025 jyly ótken álem chempionatynda komanda 7-oryn ielengen. Sondai-aq 2024 jyly Ázerbaijanda ótken SAF halyqaralyq festivalinde birinshi oryn alǵan. Budan bólek, 2026 jyly Vetnamda ótken Vietnam Signature Event jáne Beijińde ótken Asia Open halyqaralyq jarystarynda jartylai finalǵa deiin jetken. Al 2025–2026 jyldary Qazaqstannyń ulttyq chempionatynda eki ret chempion atanǵan.
“Joldamany 2026 jylǵy Qazaqstan Ulttyq Chempionatynda Robot Skills sanatynan 1 oryn alyp, utyp aldyq”, - deidi ol.
Muhit asý úshin qansha qarajat kerek?
Onyń aitýynsha, VEX Robotics World Championship – robototehnika salasyndaǵy eń iri halyqaralyq jarystardyń biri. Bul dodaǵa jyl saiyn álemniń shamamen 60 elinen 2400-den astam komanda qatysady.
“Bul – sporttyq robototehnika jarysy. Sondyqtan biz jarys erejesine sáikes jasalǵan robotpen qatysamyz. VEX V5 platformasynda jyl saiyn komandalarǵa arnaiy tapsyrmalar beriledi. Sol tapsyrmalardy eń tiimdi oryndaǵan robottar jeńimpaz atanady. Bizdiń robot S++ tilinde jazylǵan kod arqyly avtonomdy túrde jumys isteidi”, – deidi komanda jetekshisi.
Alaida jarysqa qatysý úshin qomaqty qarajat qajet. Janel Ýrazkanovanyń aitýynsha, ár qatysýshyǵa ushaq bileti shamamen 500 myń teńgeni quraidy. Al barlyq qatysýshy men tálimgerlerge arnalǵan qonaq úi shyǵyndary 1,5 million teńge shamasynda. Jalpy alǵanda, komandaǵa sapardy uiymdastyrý úshin 5,5 million teńge qajet.
Qazirgi ýaqytta komanda demeýshiler izdep jatyr. Komanda jetekshisi olardyń túrli qormen jáne kásipkerlermen bailanys ornatqanyn aitty. Alaida ázirge naqty qoldaý kórsetetin demeýshi tabylmaǵan.
“Qazaqstandaǵy birneshe qormen bailanystyq, biraq olardyń kópshiligi kómektese almaitynyn aitty. Qazir jeke kásipkerlerden de qoldaý surap jatyrmyz. AQSh-ta ótetin jarysqa barý edáýir qarjyny talap etedi, al qatysýshylardyń kóbinde mundai qarajat joq. Eger demeýshi tabylmasa, Qazaqstanǵa berilgen oryn paidalanylmai qalýy múmkin”, – dedi Janel Ýrazkanova.
Komanda músheleri demeýshilerge qajetti barlyq aqparatty, sonyń ishinde shyǵyndar smetasy men prezentatsiialardy usynýǵa daiyn ekenin jetkizdi. Jas ónertapqyshtar qoǵam nazaryn aýdarý arqyly halyqaralyq jarysta Qazaqstannyń namysyn qorǵaýǵa múmkindik tabamyz dep úmittenedi.
