ەلەمدٸك ارەنادا ەلٸمٸزدٸڭ اتىن اسقاقتاتىپ جٷرگەن “Samruq” روبوتوتەحنيكا كومانداسى اقش-تا ٶتەتٸن VEX Robotics World Championship 2026 ەلەم چەمپيوناتىنا جولداما الدى. الايدا تالايدى شاڭ قاپتىرعان ٶرەندەرٸمٸزدٸڭ مۇحيت اسۋىنا قارجى تاپشىلىعى قولبايلاۋ بولىپ تۇر. تٶرت جىلدىق ەڭبەك پەن ماڭداي تەردٸڭ ٶتەۋٸ - دەمەۋشٸلەردٸڭ قولداۋىنا تٸكەلەي بايلانىستى. بۇل تۋرالى كوماندا جەتەكشٸسٸ جانەل ۋرازكانوۆا Dalanews.kz رەداكتسيياسىنا مەلٸمدەدٸ.
جەڭٸسپەن ٶرٸلگەن جول
جانەل ۋرازكانوۆا باستاعان سەگٸز ٶنەرتاپقىشتىڭ روبوتوتەحنيكا سالاسىندا جٷرگەنٸنە تٶرت جىلدىڭ جٷزٸ بولعان.
وسى ۋاقىت ٸشٸندە كوماندا بٸرقاتار حالىقارالىق جەنە ۇلتتىق جارىستاردا جوعارى نەتيجە كٶرسەتكەن.
مەسەلەن, 2025 جىلى ٶتكەن ەلەم چەمپيوناتىندا كوماندا 7-ورىن يەلەنگەن. سونداي-اق 2024 جىلى ەزەربايجاندا ٶتكەن SAF حالىقارالىق فەستيۆالٸندە بٸرٸنشٸ ورىن العان. بۇدان بٶلەك, 2026 جىلى ۆەتنامدا ٶتكەن Vietnam Signature Event جەنە بەيجٸڭدە ٶتكەن Asia Open حالىقارالىق جارىستارىندا جارتىلاي فينالعا دەيٸن جەتكەن. ال 2025–2026 جىلدارى قازاقستاننىڭ ۇلتتىق چەمپيوناتىندا ەكٸ رەت چەمپيون اتانعان.
“جولدامانى 2026 جىلعى قازاقستان ۇلتتىق چەمپيوناتىندا Robot Skills ساناتىنان 1 ورىن الىپ, ۇتىپ الدىق”, - دەيدٸ ول.
مۇحيت اسۋ ٷشٸن قانشا قاراجات كەرەك?
ونىڭ ايتۋىنشا, VEX Robotics World Championship – روبوتوتەحنيكا سالاسىنداعى ەڭ ٸرٸ حالىقارالىق جارىستاردىڭ بٸرٸ. بۇل دوداعا جىل سايىن ەلەمنٸڭ شامامەن 60 ەلٸنەن 2400-دەن استام كوماندا قاتىسادى.
“بۇل – سپورتتىق روبوتوتەحنيكا جارىسى. سوندىقتان بٸز جارىس ەرەجەسٸنە سەيكەس جاسالعان روبوتپەن قاتىسامىز. VEX V5 پلاتفورماسىندا جىل سايىن كوماندالارعا ارنايى تاپسىرمالار بەرٸلەدٸ. سول تاپسىرمالاردى ەڭ تيٸمدٸ ورىنداعان روبوتتار جەڭٸمپاز اتانادى. بٸزدٸڭ روبوت س++ تٸلٸندە جازىلعان كود ارقىلى اۆتونومدى تٷردە جۇمىس ٸستەيدٸ”, – دەيدٸ كوماندا جەتەكشٸسٸ.
الايدا جارىسقا قاتىسۋ ٷشٸن قوماقتى قاراجات قاجەت. جانەل ۋرازكانوۆانىڭ ايتۋىنشا, ەر قاتىسۋشىعا ۇشاق بيلەتٸ شامامەن 500 مىڭ تەڭگەنٸ قۇرايدى. ال بارلىق قاتىسۋشى مەن تەلٸمگەرلەرگە ارنالعان قوناق ٷي شىعىندارى 1,5 ميلليون تەڭگە شاماسىندا. جالپى العاندا, كومانداعا ساپاردى ۇيىمداستىرۋ ٷشٸن 5,5 ميلليون تەڭگە قاجەت.
قازٸرگٸ ۋاقىتتا كوماندا دەمەۋشٸلەر ٸزدەپ جاتىر. كوماندا جەتەكشٸسٸ ولاردىڭ تٷرلٸ قورمەن جەنە كەسٸپكەرلەرمەن بايلانىس ورناتقانىن ايتتى. الايدا ەزٸرگە ناقتى قولداۋ كٶرسەتەتٸن دەمەۋشٸ تابىلماعان.
“قازاقستانداعى بٸرنەشە قورمەن بايلانىستىق, بٸراق ولاردىڭ كٶپشٸلٸگٸ كٶمەكتەسە المايتىنىن ايتتى. قازٸر جەكە كەسٸپكەرلەردەن دە قولداۋ سۇراپ جاتىرمىز. اقش-تا ٶتەتٸن جارىسقا بارۋ ەدەۋٸر قارجىنى تالاپ ەتەدٸ, ال قاتىسۋشىلاردىڭ كٶبٸندە مۇنداي قاراجات جوق. ەگەر دەمەۋشٸ تابىلماسا, قازاقستانعا بەرٸلگەن ورىن پايدالانىلماي قالۋى مٷمكٸن”, – دەدٸ جانەل ۋرازكانوۆا.
كوماندا مٷشەلەرٸ دەمەۋشٸلەرگە قاجەتتٸ بارلىق اقپاراتتى, سونىڭ ٸشٸندە شىعىندار سمەتاسى مەن پرەزەنتاتسييالاردى ۇسىنۋعا دايىن ەكەنٸن جەتكٸزدٸ. جاس ٶنەرتاپقىشتار قوعام نازارىن اۋدارۋ ارقىلى حالىقارالىق جارىستا قازاقستاننىڭ نامىسىن قورعاۋعا مٷمكٸندٸك تابامىز دەپ ٷمٸتتەنەدٸ.
