Nidiń aitýynsha, ol dopingtiń anyqtalǵany jaily habardy keshe tańda estigen. "Men úshin bul kútpegen jańalyq boldy. London olimpiadasy tarihqa ainaldy ǵoi, bir jarym aidan keiin biz Olimpiada oiyndaryna attanǵaly otyrǵanbyz, al munda osyndai daý shyqty... Doping-synamalardy jyl basynda emes, Rioǵa týra eki ai qalǵanda qaita teksere bastaǵany alańdatady. Mende kóp suraq týyndap otyr. Nelikten dál osyndai merzim? Sportshylar kinásizdigin dáleldep úlgermesin dedi me, apelliatsiiaǵa berip úlgermesin dedi me?", - dep tańdanady bas bapker.
Aleksei Ni qoiyp otyrǵan taǵy bir suraq Rioǵa attanǵaly otyrǵan sportshylardyń ǵana shettetilýi jaily. "Soǵan qaraǵanda aldaǵy Olimpiadada kimniń qalai óner kórsetetinine boljam jasalǵan bolýy múmkin, al shettetilgen sportshylardyń altyn medal alýǵa degen múmkindigi zor. Mansap jolyn aiaqtaǵaly jatqan birde-bir sportshy shaqyrtylmady, sebebi olar endigi eshkimge kerek emes. Olardyń logikasyna salsaq, biz Olimpiadada bir ret jeńgennen keiin dereý sportpen qosh aitysýymyz qajet pe?! Jeńisten úmitti bolyp, bireýlerge kedergi jasai bastasań - saǵan ádiletsiz ádisterdi qoldanady. Sebebi men álem birinshiligine bir ai qalǵanda ǵana osyndai daýdyń shyǵyp jatqanyn basqasha túsindire almaimyn. Mundai qym-qýyt jaǵdaida eki attap bige shyǵatyn múmkindik az", - dep bildirdi pikirin Aleksei Ni.
Ni Lozannadaǵy zerthananyń máselesine de nazar aýdaryp otyr. Aitýynsha, bul zerthana A jáne B synamalaryn teksergen. Sóitse A synamalarynda tyiym salynǵan zattardyń bar ekenin kórsetip, B synamasy ony joqqa shyǵarǵan. "VADA tirkegen zerthana qalaisha osyndai qatelikter jasaidy? Men bireý-mireýdi úrkitip, bopsalaǵym kelmeidi, men tek óz sportshylarymdy qorǵaǵym keledi, ádildiktiń bolǵanyn qalaimyn, - deidi bas bapker, - Munyń kimniń múddesi ekenin men bilmeimin. Men saiasatker emespin, kóripkel emespin. Men - eshteńege qaramastan sportshylardy daiyndap júrgen bapkermin. Sportshynyń barlyǵy jattyǵyp jatyr jáne másele anyq bolyp, bizdiń paidamyzǵa sheshiledi dep senemin. Al eger Olimpiadaǵa jibermese, Lozannadaǵy arbitraj sotyna deiin baramyz. Sportshylardyń sottan ádil sheshim alǵanyn kórmeppin, alaida jarysty eshkim toqtata almaidy... Osyǵan qaramastan osyndai jaǵdailar qaitalanbaýy úshin óz ustanymymyzda qala bermekpiz", - dedi ol.
Sonymen qatar, bas bapker tórt sportshy qoldandy delingen preparattarǵa qatysty oiyn aitty. "Biz ondai preparattardy qoldanbaǵanymyzdy senimmen aita alamyn. Anyqtamalyqqa qarap kórińizder, bul óte kúrdeli preparattar, al joǵary deńgeili sportshylar osylai qaýip-qaterge bara ma?", - deidi bas bapker.
Bapkerdiń aitýynsha, doping daýyna iligip jatqandardyń kil TMD elderinen ekendigi de kúmán týǵyzbai qoimaidy. Ol Hiýstondaǵy chempionattan keiin qazaqstandyq aýyratletterdiń bireýlerdiń nysanyna túsetinin oilaǵanyn da aityp otyr.
Derekkóz: kaz.tengrinews.kz
