Almatyda kámeletke tolmaǵan tórt bala jetim qaldy. 2022 jyly Qandy Qańtar oqiǵasy kezinde olardyń ákesi oqqa ushyp, alǵan jaraqatynan kóz jumǵan edi. Al kúni keshe analary Saia Baýyrjanqyzy jol apatynan qaza tapty. Qaiǵydan qan jutqan áýletke kóńil aitýshylar qatary kóp boldy, solardyń biri — Qazaq Stroy kompaniiasy, dep habarlaidy Dalanews.kz.
Qazaq Stroy ujymy ata-anasynan aiyrylǵan balalarǵa 95 sharshy metrlik úsh bólmeli páter syilady.
“Endi balalar ózderiniń jyly ári jaily úilerine jaiǵasady”, — dedi Qazaq Stroy basshysy Nurlan Artyqbaev.
Sonymen qatar Qazaq Stroy basshysy balalarǵa ai saiyn 100.000 teńge kóleminde kómek kórsetý týraly sheshim qabyldady.
Nurlan Artyqbaev bul áreketin qazaq ultynyń birligi men kómegi retinde atap ótti.
“Biz balalarǵa ata-anasyn qaitaryp bere almaimyz. Alaida olardyń bolashaǵynyń jarqyn bolýy úshin barymyzdy salamyz. Biz — qazaqpyz, bizdiń kúshimiz birlikte. Osy úi balalarǵa jailylyq pen úmit oshaǵy bolsyn. Al bizdiń kómegimiz álemde jaqsy adamdardyń bar ekenin eske salyp, bolashaqtaryna senim uialatsa deimiz”, — deidi ol.
Búgin Qazaq Stroy ókilderi balalarǵa páter kilti men sertifikatty tabys etti.
"Qazaq Stroy atynan Saia Esengeldiniń týǵan-týystaryna qaiǵyryp kóńil aitamyz! Saia týraly jaryq estelik balalardyń júreginde máńgi saqtalsyn. Al olardyń bolashaǵy jaqsylyq pen jylýlyqqa jáne qamqorlyqqa toly bolsyn! Jyly júrek pen qamqorlyq osy álemdi birshama jaryq etedi”, — dep qosty kompaniia.
Qazaq Stroy kompaniiasy — úiler salyp qana qoimai, bolashaqta eshkim jalǵyz qalmaityn qoǵamdy qurýdy maqsat etedi.
Eske salaiyq, 31 jastaǵy Saia Esengeldiniń kúieýi Erkebulan Sydyqbaev Qańtar oqiǵasy kezinde quiymshaǵyna oq tiip, aýrýhanada kóz jumdy. Al 4 aqpanda onyń jubaiy Saia Esengeldi Almaty – Bishkek tasjolynda kólik apatynan qaza boldy. Búgin, iaǵni 6 aqpanda Almaty jurty ony aqtyq saparǵa shyǵaryp saldy.
Aita keteiik, buǵan deiin tórt balamen jesir qalǵan Saia qala arasynda taksi aidap, otbasyn asyrap júrgen edi.
