الماتىدا كامەلەتكە تولماعان ءتورت بالا جەتىم قالدى. 2022 جىلى قاندى قاڭتار وقيعاسى كەزىندە ولاردىڭ اكەسى وققا ۇشىپ، العان جاراقاتىنان كوز جۇمعان ەدى. ال كۇنى كەشە انالارى سايا باۋىرجان قىزى جول اپاتىنان قازا تاپتى. قايعىدان قان جۇتقان اۋلەتكە كوڭىل ايتۋشىلار قاتارى كوپ بولدى، سولاردىڭ ءبىرى — Qazaq Stroy كومپانياسى، دەپ حابارلايدى Dalanews.kz.

Qazaq Stroy ۇجىمى اتا-اناسىنان ايىرىلعان بالالارعا 95 شارشى مەترلىك ءۇش بولمەلى پاتەر سىيلادى.

“ەندى بالالار وزدەرىنىڭ جىلى ءارى جايلى ۇيلەرىنە جايعاسادى”، — دەدى Qazaq Stroy باسشىسى نۇرلان ارتىقبايەۆ.

سونىمەن قاتار Qazaq Stroy باسشىسى بالالارعا اي سايىن 100.000 تەڭگە كولەمىندە كومەك كورسەتۋ تۋرالى شەشىم قابىلدادى.

نۇرلان ارتىقبايەۆ بۇل ارەكەتىن قازاق ۇلتىنىڭ بىرلىگى مەن كومەگى رەتىندە اتاپ ءوتتى.

“ءبىز بالالارعا اتا-اناسىن قايتارىپ بەرە المايمىز. الايدا ولاردىڭ بولاشاعىنىڭ جارقىن بولۋى ءۇشىن بارىمىزدى سالامىز. ءبىز — قازاقپىز، ءبىزدىڭ كۇشىمىز بىرلىكتە. وسى ءۇي بالالارعا جايلىلىق پەن ءۇمىت وشاعى بولسىن. ال ءبىزدىڭ كومەگىمىز الەمدە جاقسى ادامداردىڭ بار ەكەنىن ەسكە سالىپ،  بولاشاقتارىنا سەنىم ۇيالاتسا دەيمىز”، — دەيدى ول.

بۇگىن Qazaq Stroy وكىلدەرى بالالارعا پاتەر كىلتى مەن سەرتيفيكاتتى تابىس ەتتى.

"Qazaq Stroy اتىنان سايا ەسەنگەلدىنىڭ تۋعان-تۋىستارىنا قايعىرىپ كوڭىل ايتامىز! سايا تۋرالى جارىق ەستەلىك بالالاردىڭ جۇرەگىندە ماڭگى ساقتالسىن. ال ولاردىڭ بولاشاعى جاقسىلىق پەن جىلۋلىققا جانە قامقورلىققا تولى بولسىن! جىلى جۇرەك پەن قامقورلىق وسى الەمدى ءبىرشاما جارىق ەتەدى”، — دەپ قوستى كومپانيا.

Qazaq Stroy كومپانياسى — ۇيلەر سالىپ قانا قويماي، بولاشاقتا ەشكىم جالعىز قالمايتىن قوعامدى قۇرۋدى ماقسات ەتەدى.

ەسكە سالايىق، 31 جاستاعى سايا ەسەنگەلدىنىڭ كۇيەۋى ەركەبۇلان سىدىقبايەۆ قاڭتار وقيعاسى كەزىندە قۇيىمشاعىنا وق ءتيىپ، اۋرۋحانادا كوز جۇمدى. ال 4 اقپاندا ونىڭ جۇبايى سايا ەسەنگەلدى الماتى – بىشكەك تاسجولىندا كولىك اپاتىنان قازا بولدى. بۇگىن، ياعني 6 اقپاندا الماتى جۇرتى ونى اقتىق ساپارعا شىعارىپ سالدى.

ايتا كەتەيىك، بۇعان دەيىن ءتورت بالامەن جەسىر قالعان سايا قالا اراسىندا تاكسي ايداپ، وتباسىن اسىراپ جۇرگەن ەدى.