Saltanatty kezdesý Dostyq úiinde ótti. Altyn jáne kúmis alqalardy tapsyrý rásimine búkil óńirdiń kóp balaly analary qatysty. Jubaiymen úsh ul men úsh qyz tárbielep otyrǵan Svetlana Vasiýkevich Ertis aýdanynan keldi. Svetlanany halyqaralyq áielder kúnimen únemi ul-qyzdary quttyqtaidy.
– 8 naýryz kúni olar meni tańerteńnen quttyqtai bastaidy, – dedi Svetlana Vasiýkevich. – Olar ózderi ashyq hattar men gúlder jasap, syiǵa tartady. Men úshin eń basty syilyq – balalarymnyń quttyqtaýlary.
Sonymen birge, «Kúmis alqa» belgisi Abrarova Sholpan, Asylǵazy Dinara, Aýǵan Aiytjan, Ahmetova Jibek, Baizaqova Naǵira, Qalieva Ainash, Qapasova Baqytgúl, Kóshkinbaeva Ainagúl, Kósherbaeva Ainash, Nurjanova Aigúl, Nurhanova Sánitas, Ómei Kúmis, Panachýhidi Elizaveta, Smaǵulova Nazigúl jáne Shansharova Aqmaralǵa berildi. Jaqsylyqova Kúlanar, Qurmanalieva Sholpan jáne Tasqaranova Táttigúlge «Altyn alqa» belgileri tapsyryldy. Áielderge aitqan sózinde aimaq basshysy qoǵamdaǵy birlik pen yntymaq názik jandylardyń arqasy ekendigin atap ótti.
– Sizder táýelsiz Qazaqstannyń óskeleń urpaǵyn tárbielep, ul-qyzdaryńyzdyń baqyty úshin, iaǵni, elimizdiń baqýattylyǵy jolynda eńbek etip kelesizder, – dedi Ábilqaiyr Sqaqov. – Biz, er azamattar sizderge otbasyndaǵy qamqorlyq, jarqyn bolashaq qurýdaǵy eńbekterińiz úshin máńgi-baqi qaryzdarmyz. Sizderge myqty densaýlyq, tamasha kóńil-kúi, ómirlerińizde jarqyn sátterdiń kóp bolýyn tileimin.
Qazirgi tańda Pavlodar oblysynda 12 myńnan astam kóp balaly otbasy turyp jatyr. «Kúmis alqa» belgisi alty bala tárbielep otyrǵan, al, «Altyn alqa» alty jáne odan da kóp balalar ósirip jatqan analarǵa beriledi.
Taǵay oqyńyz:
https://dalanews.kz/50285
