2025 jyldyń 26 qyrkúieginde Abai ýniversitetinde 1-kýrs stýdentterine arnalǵan dástúrli «Qosh keldin, Student» stýdenttik qabyldaý keshi óz máresine jetti, dep habarlaidy Dalanews.kz
Kesh saǵat 16:00-de saltanatty túrde ashylyp, dástúrli fanfardyń daýsymen jáne Abai ýniversitetiniń jas ónerpazdarynyń «Abai enerjy» biimen jalǵasty. Abai atyndaǵy QazUPÝ Basqarma Tóraǵasy-Rektory Bolat Anapiiaulynyń jalyndy quttyqtaý sózi stýdentterge úlken senim men shabyt syilady.
– Uly Abaidyń esimin ielengen qara shańyraqqa qosh keldińizder! Sizder úshin arman aqiqatqa ainaldy. Keshegi 8 myńnan astam talapker búgin Abai ýniversitetiniń shákirti. Elimizde 127 joǵary oqý orny bar, biraq sizder elimizdiń tuńǵysh joǵary oqý orny – Abai ýniversitetin tańdadyńyzdar. Óitkeni, Abai – dana qazaqqa, Abai ýniversiteti – dara qazaqta. Júz jylǵa jýyqtaǵan tarihy bar qasietti qara shańyraq boilaryńyzdaǵy jiger men talantqa jaryq jol ashady dep úmittenem, – degen B.Tilep saltanatty túrde sharany ashty.
Biylǵy UBT-dan 140 ball alyp, Abai ýniversitetin tańdaǵan Sanjar Qýandyquly bilim jolyndaǵy jaýapkershilikke bailanysty barlyq birinshi kýrs stýdentteriniń atynan ant berdi.
Kesh barysynda ýniversitettiń talantty stýdentteri sahnada úzdik ónerlerin kórsetti. Áleýmettik jelide tanymal, Abai jastarynyń júregine jol tapqan «Abaiymnan tapqanym» áninen bastap, «Jas STAR» tobynyń zamanaýi poppýrileri, filologiia fakýltetiniń «Aidai» bi tobynyń áserli «Abai World» bii, sheteldik stýdentterdiń qazaq tilindegi «Abaiǵa arnaý» áni jáne «Kóshedegiler» jaidarman komandasynyń ázilderi keshtiń sánin kirgizdi. Sonymen qatar, «A-BLUSE band» tobynyń jańa mýzykalyq nómirleri jastardy áýen men ritmge bóledi.
Qazaq estradasynyń juldyzdarynyń sahnaǵa kóterilýi odan ári saltanat kórigin qyzdyra tústi. Qundy hedlainerler qatarynda QANAY, Qýandyq Raqym, Baǵlan Ábdiraiymov jáne Nurbolat Abdýlin syndy tanymal ánshiler óner kórsetti. Sonymen birge, fakýltetter arasynda ótken «Úzdik stil» baiqaýy erekshe qyzyǵýshylyq týdyryp, jeńimpazdarǵa saýda ortalyqtary men ýniversitettiń qoldaýymen baǵaly syilyqtar tabystaldy.
Stýdentter men qonaqtar kesh sońynda uiymdastyrylǵan bi keshinde kóńilderin kóterip, erekshe atmosferada ádemi ýaqyt ótkizdi. Paidalanylǵan jaryq effektileri, aspandaǵan áýe shary men saltanatty otshashý sharanyń erekshe kórkemdigin arttyrdy.
Sharaǵa qatysqan stýdentter «Abai ýniversitetiniń stýdenti ataný – úlken mártebe» dep maqtanyshpen atap ótti. Olar bul keshten alǵan áserlerin bólise otyryp, bilim alýdyń, ónerge degen súiispenshiliktiń jáne birlik seziminiń qanshalyqty mańyzdy ekenin erekshe sezingenderin jetkizdi.
– «Men Abai ýniversitetiniń stýdenti ekenime shyn júregimmen maqtanamyn. Osyndai erekshe keshke qatysyp, ózimdi bilim ordasynyń bir múshesi retinde sezindim. Bul shara bizge jańa dostar tabýǵa, shyǵarmashylyq qabiletterimizdi kórsetýge múmkindik berdi», – deidi elimizdegi tuńǵysh ýniversitettiń tabaldyryǵyn jańa attaǵan Aijan.
Uiymdastyrýshylar jas shákirtterge aldaǵy ýaqytta da osyndai rýhty kóteretin, bilim men ónerdi ushtastyratyn keshterdiń jii ótetinin jetkizdi. Sóitip, qara shańyraqta jańa tarihtyń jańa paraǵy ashyldy.
