2025 جىلدىڭ 26 قىركۇيەگىندە اباي ۋنيۆەرسيتەتىندە 1-كۋرس ستۋدەنتتەرىنە ارنالعان ءداستۇرلى «Qosh keldin، Student» ستۋدەنتتىك قابىلداۋ كەشى ءوز مارەسىنە جەتتى، دەپ حابارلايدى Dalanews.kz
كەش ساعات 16:00-دە سالتاناتتى تۇردە اشىلىپ، ءداستۇرلى فانفاردىڭ داۋسىمەن جانە اباي ۋنيۆەرسيتەتىنىڭ جاس ونەرپازدارىنىڭ «Abai enerjy» بيىمەن جالعاستى. اباي اتىنداعى قازۇپۋ باسقارما توراعاسى-رەكتورى بولات اناپيا ۇلىنىڭ جالىندى قۇتتىقتاۋ ءسوزى ستۋدەنتتەرگە ۇلكەن سەنىم مەن شابىت سىيلادى.
– ۇلى ابايدىڭ ەسىمىن يەلەنگەن قارا شاڭىراققا قوش كەلدىڭىزدەر! سىزدەر ءۇشىن ارمان اقيقاتقا اينالدى. كەشەگى 8 مىڭنان استام تالاپكەر بۇگىن اباي ۋنيۆەرسيتەتىنىڭ شاكىرتى. ەلىمىزدە 127 جوعارى وقۋ ورنى بار، ءبىراق سىزدەر ەلىمىزدىڭ تۇڭعىش جوعارى وقۋ ورنى – اباي ۋنيۆەرسيتەتىن تاڭدادىڭىزدار. ويتكەنى، اباي – دانا قازاققا، اباي ۋنيۆەرسيتەتى – دارا قازاقتا. ءجۇز جىلعا جۋىقتاعان تاريحى بار قاسيەتتى قارا شاڭىراق بويلارىڭىزداعى جىگەر مەن تالانتقا جارىق جول اشادى دەپ ۇمىتتەنەم، – دەگەن ب.تىلەپ سالتاناتتى تۇردە شارانى اشتى.
بيىلعى ۇبت-دان 140 بالل الىپ، اباي ۋنيۆەرسيتەتىن تاڭداعان سانجار قۋاندىق ۇلى ءبىلىم جولىنداعى جاۋاپكەرشىلىككە بايلانىستى بارلىق ءبىرىنشى كۋرس ستۋدەنتتەرىنىڭ اتىنان انت بەردى.
كەش بارىسىندا ۋنيۆەرسيتەتتىڭ تالانتتى ستۋدەنتتەرى ساحنادا ۇزدىك ونەرلەرىن كورسەتتى. الەۋمەتتىك جەلىدە تانىمال، اباي جاستارىنىڭ جۇرەگىنە جول تاپقان «ابايىمنان تاپقانىم» انىنەن باستاپ، «جاس STAR» توبىنىڭ زاماناۋي پوپپۋريلەرى، فيلولوگيا فاكۋلتەتىنىڭ «ايداي» بي توبىنىڭ اسەرلى «Abai World» ءبيى، شەتەلدىك ستۋدەنتتەردىڭ قازاق تىلىندەگى «ابايعا ارناۋ» ءانى جانە «كوشەدەگىلەر» جايدارمان كومانداسىنىڭ ازىلدەرى كەشتىڭ ءسانىن كىرگىزدى. سونىمەن قاتار، «A-BLUSE band» توبىنىڭ جاڭا مۋزىكالىق نومىرلەرى جاستاردى اۋەن مەن ريتمگە بولەدى.
قازاق ەستراداسىنىڭ جۇلدىزدارىنىڭ ساحناعا كوتەرىلۋى ودان ءارى سالتانات كورىگىن قىزدىرا ءتۇستى. قۇندى حەدلاينەرلەر قاتارىندا QANAY، قۋاندىق راقىم، باعلان ءابدىرايىموۆ جانە نۇربولات ابدۋلين سىندى تانىمال انشىلەر ونەر كورسەتتى. سونىمەن بىرگە، فاكۋلتەتتەر اراسىندا وتكەن «ۇزدىك ستيل» بايقاۋى ەرەكشە قىزىعۋشىلىق تۋدىرىپ، جەڭىمپازدارعا ساۋدا ورتالىقتارى مەن ۋنيۆەرسيتەتتىڭ قولداۋىمەن باعالى سىيلىقتار تابىستالدى.
ستۋدەنتتەر مەن قوناقتار كەش سوڭىندا ۇيىمداستىرىلعان بي كەشىندە كوڭىلدەرىن كوتەرىپ، ەرەكشە اتموسفەرادا ادەمى ۋاقىت وتكىزدى. پايدالانىلعان جارىق ەففەكتىلەرى، اسپانداعان اۋە شارى مەن سالتاناتتى وتشاشۋ شارانىڭ ەرەكشە كوركەمدىگىن ارتتىردى.
شاراعا قاتىسقان ستۋدەنتتەر «اباي ۋنيۆەرسيتەتىنىڭ ستۋدەنتى اتانۋ – ۇلكەن مارتەبە» دەپ ماقتانىشپەن اتاپ ءوتتى. ولار بۇل كەشتەن العان اسەرلەرىن بولىسە وتىرىپ، ءبىلىم الۋدىڭ، ونەرگە دەگەن سۇيىسپەنشىلىكتىڭ جانە بىرلىك سەزىمىنىڭ قانشالىقتى ماڭىزدى ەكەنىن ەرەكشە سەزىنگەندەرىن جەتكىزدى.
– «مەن اباي ۋنيۆەرسيتەتىنىڭ ستۋدەنتى ەكەنىمە شىن جۇرەگىممەن ماقتانامىن. وسىنداي ەرەكشە كەشكە قاتىسىپ، ءوزىمدى ءبىلىم ورداسىنىڭ ءبىر مۇشەسى رەتىندە سەزىندىم. بۇل شارا بىزگە جاڭا دوستار تابۋعا، شىعارماشىلىق قابىلەتتەرىمىزدى كورسەتۋگە مۇمكىندىك بەردى»، – دەيدى ەلىمىزدەگى تۇڭعىش ۋنيۆەرسيتەتتىڭ تابالدىرىعىن جاڭا اتتاعان ايجان.
ۇيىمداستىرۋشىلار جاس شاكىرتتەرگە الداعى ۋاقىتتا دا وسىنداي رۋحتى كوتەرەتىن، ءبىلىم مەن ونەردى ۇشتاستىراتىن كەشتەردىڭ ءجيى وتەتىنىن جەتكىزدى. ءسويتىپ، قارا شاڭىراقتا جاڭا تاريحتىڭ جاڭا پاراعى اشىلدى.
