Abai oblysynda qasqyr qaptady. Aýyl turǵyndarynyń aitýynsha, tek biyldyń ózinde bir aýdannyń aýmaǵynda ashyqqan jyrtqyshtar 450-den astam siyr men qoidy, sondai-aq jylqyny qapqan, dep habarlaidy Dalanews.kz KTK telearnasyna silteme jasap.
Sharýa qojalyqtaryna keltirilgen shyǵyn 160 million teńgeden asady.
"Oqiǵalar sany tek artyp keledi. Men – sharýashylyq basshysymyn. Sońǵy birneshe jylda qasqyrlar tipti qoraǵa deiin kelip, siyr men jylqylardy sol jerde jep ketedi", - deidi jergilikti turǵyn.
Turǵyndardyń aitýynsha, biylǵy jazdyń ózinde árbir sharýashylyqta qasqyrlar kem degende bes bas maldy jaryp ketken. Jyrtqyshtardyń sanyn baqylaý qiynǵa soǵyp otyr. Taýly aimaq mashinamen ań aýlaýdy qiyndatady. Sondyqtan aýyl halqyna kómek qolyn sozatyndardy tabý ońai bolmaǵan.
Sharýalar bastamasymen aýdanda biologiialyq tepe-teńdikti saqtaý jáne qasqyr sanyna baqylaý júrgizý úshin arnaiy jarystar uiymdastyryldy. Jergilikti turǵyndar qyran qustarmen jáne tazy ittermen ańshylyq jasaityn saiatshylardy tartýdy jón kórdi. Osylaisha olar úi janýarlaryn aman saqtap qalýǵa úmittenedi.
"Taýdyń etegindegi aýyldardyń ornalasýyna bailanysty arnaiy qural-jabdyq pen kólikti qoldanatyn ańshylyq túrleri óte qiyn. Sondyqtan 2023 jyly biz arnaiy ańshylar shaqyrdyq. Ótken jyly 14 adamdy shaqyryp, qajetti jabdyqtyń bárin berdik. Alaida eki jyldaǵy jumys nátijesi aitarlyqtai bolmady", – deidi Keńgirbai bi aýyldyq okrýginiń ákimi Darhan Amangeldin.
