Абай облысында қасқыр қаптады. Ауыл тұрғындарының айтуынша, тек биылдың өзінде бір ауданның аумағында ашыққан жыртқыштар 450-ден астам сиыр мен қойды, сондай-ақ жылқыны қапқан, деп хабарлайды Dalanews.kz КТК телеарнасына сілтеме жасап.
Шаруа қожалықтарына келтірілген шығын 160 миллион теңгеден асады.
"Оқиғалар саны тек артып келеді. Мен – шаруашылық басшысымын. Соңғы бірнеше жылда қасқырлар тіпті қораға дейін келіп, сиыр мен жылқыларды сол жерде жеп кетеді", - дейді жергілікті тұрғын.
Тұрғындардың айтуынша, биылғы жаздың өзінде әрбір шаруашылықта қасқырлар кем дегенде бес бас малды жарып кеткен. Жыртқыштардың санын бақылау қиынға соғып отыр. Таулы аймақ машинамен аң аулауды қиындатады. Сондықтан ауыл халқына көмек қолын созатындарды табу оңай болмаған.
Шаруалар бастамасымен ауданда биологиялық тепе-теңдікті сақтау және қасқыр санына бақылау жүргізу үшін арнайы жарыстар ұйымдастырылды. Жергілікті тұрғындар қыран құстармен және тазы иттермен аңшылық жасайтын саятшыларды тартуды жөн көрді. Осылайша олар үй жануарларын аман сақтап қалуға үміттенеді.
"Таудың етегіндегі ауылдардың орналасуына байланысты арнайы құрал-жабдық пен көлікті қолданатын аңшылық түрлері өте қиын. Сондықтан 2023 жылы біз арнайы аңшылар шақырдық. Өткен жылы 14 адамды шақырып, қажетті жабдықтың бәрін бердік. Алайда екі жылдағы жұмыс нәтижесі айтарлықтай болмады", – дейді Кеңгірбай би ауылдық округінің әкімі Дархан Амангелдин.
