Qazaqstanda bilim berý uiymdaryn, sonyń ishinde mektepter men balabaqshalardy kúzetý boiynsha biryńǵai talaptar bekitildi. Bul týraly Premer-ministrdiń orynbasary Ermek Kósherbaev málimdedi, dep habarlaidy Dalanews.kz.
Onyń aitýynsha, bilim berý mekemeleriniń qaýipsizdigin shtattaǵy qyzmetkerler nemese litsenziiasy bar kúzet uiymdary qamtamasyz etedi. Osy maqsatta kúzet qyzmetterin satyp alýǵa arnalǵan úlgilik konkýrs qujattamasy ázirlenip, onda naqty irikteý talaptary men mamandardyń biliktilik deńgeii, tehnikalyq-jabdyqtaý jaǵdaiy qamtylǵan.
Atap aitqanda, kúzet uiymdaryna qoiylatyn negizgi talaptar mynalar:
kúzetshiniń jasy – 25 pen 50 jas aralyǵynda bolýy tiis;
arnaiy kásibi daiyndyqtan ótýi qajet;
qarý alyp júrýge jáne qoldanýǵa litsenziiasy bolýy shart;
sottylyǵy bolmaýy tiis;
jeke keńsesi bolýy qajet;
keminde eki jedel áreket etý tobynyń bar bolýy mindetti.
Búginde elimizde 6 900-den astam nysan litsenziialanǵan kúzetpen qamtamasyz etilgen.
Sonymen qatar 2022 jyldan beri 20 myńnan astam bilim berý uiymyna 220 myńnan asa beinebaqylaý kamerasy ornatylǵan. Bul kameralar aqparatty 30 táýlikke deiin saqtai alady jáne tikelei politsiianyń jedel basqarý ortalyqtaryna qosylǵan.
Premer-ministrdiń orynbasary Ermek Qosherbaevtyń aitýynsha, qazirgi tańda keibir bilim berý uiymdarynda jasandy intellekt júiesi engizilip jatyr. Bul júie býlling (qorlaý, qysym kórsetý) derekterin avtomatty túrde anyqtap, bir mezette mektep ákimshiligine eskertý jiberedi. Júie mektep ishinde ǵana emes, onyń ainalasyndaǵy aýmaqta da qaýip-qater belgilerin anyqtai alady.
