قازاقستاندا ءبىلىم بەرۋ ۇيىمدارىن، سونىڭ ىشىندە مەكتەپتەر مەن بالاباقشالاردى كۇزەتۋ بويىنشا ءبىرىڭعاي تالاپتار بەكىتىلدى. بۇل تۋرالى پرەمەر-مينيستردىڭ ورىنباسارى ەرمەك كوشەربايەۆ مالىمدەدى، دەپ حابارلايدى Dalanews.kz. 

ونىڭ ايتۋىنشا، ءبىلىم بەرۋ مەكەمەلەرىنىڭ قاۋىپسىزدىگىن شتاتتاعى قىزمەتكەرلەر نەمەسە ليسەنزياسى بار كۇزەت ۇيىمدارى قامتاماسىز ەتەدى. وسى ماقساتتا كۇزەت قىزمەتتەرىن ساتىپ الۋعا ارنالعان ۇلگىلىك كونكۋرس قۇجاتتاماسى ازىرلەنىپ، وندا ناقتى ىرىكتەۋ تالاپتارى مەن مامانداردىڭ بىلىكتىلىك دەڭگەيى، تەحنيكالىق-جابدىقتاۋ جاعدايى قامتىلعان.

اتاپ ايتقاندا، كۇزەت ۇيىمدارىنا قويىلاتىن نەگىزگى تالاپتار مىنالار:

كۇزەتشىنىڭ جاسى – 25 پەن 50 جاس ارالىعىندا بولۋى ءتيىس؛

ارنايى كاسىبي دايىندىقتان ءوتۋى قاجەت؛

قارۋ الىپ جۇرۋگە جانە قولدانۋعا ليسەنزياسى بولۋى شارت؛

سوتتىلىعى بولماۋى ءتيىس؛

جەكە كەڭسەسى بولۋى قاجەت؛

كەمىندە ەكى جەدەل ارەكەت ەتۋ توبىنىڭ بار بولۋى مىندەتتى.

بۇگىندە ەلىمىزدە 6 900-دەن استام نىسان ليسەنزيالانعان كۇزەتپەن قامتاماسىز ەتىلگەن.

سونىمەن قاتار 2022 جىلدان بەرى 20 مىڭنان استام ءبىلىم بەرۋ ۇيىمىنا 220 مىڭنان اسا بەينەباقىلاۋ كامەراسى ورناتىلعان. بۇل كامەرالار اقپاراتتى 30 تاۋلىككە دەيىن ساقتاي الادى جانە تىكەلەي پوليسيانىڭ جەدەل باسقارۋ ورتالىقتارىنا قوسىلعان.

پرەمەر-مينيستردىڭ ورىنباسارى ەرمەك قوشەربايەۆتىڭ ايتۋىنشا، قازىرگى تاڭدا كەيبىر ءبىلىم بەرۋ ۇيىمدارىندا جاساندى ينتەللەكت جۇيەسى ەنگىزىلىپ جاتىر. بۇل جۇيە بۋللينگ (قورلاۋ، قىسىم كورسەتۋ) دەرەكتەرىن اۆتوماتتى تۇردە انىقتاپ، ءبىر مەزەتتە مەكتەپ اكىمشىلىگىنە ەسكەرتۋ جىبەرەدى. جۇيە مەكتەپ ىشىندە عانا ەمەس، ونىڭ اينالاسىنداعى اۋماقتا دا قاۋىپ-قاتەر بەلگىلەرىن انىقتاي الادى.