2026 jyldan bastap Qazaqstanda kólik salyǵyn esepteý tártibi ózgeredi. Jańa erejeler kóliktiń jasyna, sanatyna jáne qunyna tikelei bailanysty bolady, dep habarlaidy Dalanews.kz.
Qazaq Expert Club sarapshysy, qarjyger Jániia Sandybaidyń aitýynsha, bul ózgeristerdiń negizgi maqsaty - áleýmettik turǵydan osal toptarǵa túsetin salyq júktemesin azaityp, qymbat kólik ieleri úshin jaýapkershilikti kúsheitý.
Kóliktiń paidalanylǵan merzimi
Alǵash ret kólik salyǵyn esepteý kezinde kóliktiń paidalanylǵan merzimi eskeriledi. Bul baǵytta tómendetý koeffitsientteri engiziledi:
-
10 jyldan 20 jylǵa deiingi kólikter úshin - salyq 30%-ǵa azaiady;
-
20 jyldan asqan kólikter úshin - 50% jeńildik qarastyrylǵan.
Bul - eldegi eski avtopark ieleri úshin aitarlyqtai qoldaý. Ulttyq statistika biýrosynyń dereginshe, Qazaqstandaǵy jeńil kólikterdiń shamamen 67%-y 10 jyldan asa ýaqyttan beri qoldanylyp keledi, al olardyń 41,5%-y 20 jyldan asqan.
Kólik sanaty naqty aiqyndalady
Buryn kólikterdi djip, pikap, fýrgon sekildi tipterge bólý kezinde daý týyndaityn. Endi bul norma alyp tastaldy. Kólik salyǵy tek tehnikalyq tólqujatta kórsetilgen sanat boiynsha esepteledi (A, B, C, D).
3 litrden asatyn qozǵaltqyshtarǵa ústeme salyq joiyldy
Buryn qozǵaltqysh kólemi 3000 kýb sm-den asatyn, 2013 jyldan keiin shyǵarylǵan kólikterge joǵary salyq salynatyn. 2026 jyldan bastap bul talap alyp tastalady.
Endi barlyq jeńil kólik biryńǵai shkala boiynsha salyq tóleidi.
Aýyl sharýashylyǵy ónimin óndirýshilerge jeńildik saqtalady
Árbir sharýa nemese fermer qojalyǵyna tiesili bir kólik kólik salyǵynan tolyq bosatylady (talaptarǵa sai bolǵan jaǵdaida).
-
Eger bir ǵana pikap bolsa, salyq tólenbeidi;
-
Birneshe kólik bolsa, jeńildik tek bireýine qoldanylady.
Qymbat kólikterge 10% aktsiz engiziledi
2026 jylǵy 1 qańtardan bastap quny 18 000 AEK-ten (shamamen 77 mln teńge) asatyn jeńil kólikterge 10% aktsiz salynady. Bul talap kólikti alǵash tirkeý kezinde de, keiin qaita satý barysynda da qoldanylady.
Zańdy tulǵalarǵa esep jeńildetildi
Kompaniialar endi kólik salyǵy boiynsha toqsan saiyn esep tapsyrmaidy. Tek jyldyq deklaratsiia jetkilikti.
Qashan kúshine enedi?
-
Jańa tártip 2026 jylǵa qatysty, iaǵni tólemder 2027 jyly júrgiziledi.
