2026 جىلدان باستاپ قازاقستاندا كولىك سالىعىن ەسەپتەۋ ءتارتىبى وزگەرەدى. جاڭا ەرەجەلەر كولىكتىڭ جاسىنا، ساناتىنا جانە قۇنىنا تىكەلەي بايلانىستى بولادى، دەپ حابارلايدى Dalanews.kz.

Qazaq Expert Club ساراپشىسى، قارجىگەر ءجانيا ساندىبايدىڭ ايتۋىنشا، بۇل وزگەرىستەردىڭ نەگىزگى ماقساتى - الەۋمەتتىك تۇرعىدان وسال توپتارعا تۇسەتىن سالىق جۇكتەمەسىن ازايتىپ، قىمبات كولىك يەلەرى ءۇشىن جاۋاپكەرشىلىكتى كۇشەيتۋ.

كولىكتىڭ پايدالانىلعان مەرزىمى

العاش رەت كولىك سالىعىن ەسەپتەۋ كەزىندە كولىكتىڭ پايدالانىلعان مەرزىمى ەسكەرىلەدى. بۇل باعىتتا تومەندەتۋ كوەففيسيەنتتەرى ەنگىزىلەدى:

• 10 جىلدان 20 جىلعا دەيىنگى كولىكتەر ءۇشىن - سالىق 30%-عا ازايادى؛

• 20 جىلدان اسقان كولىكتەر ءۇشىن - 50% جەڭىلدىك قاراستىرىلعان.

بۇل - ەلدەگى ەسكى اۆتوپارك يەلەرى ءۇشىن ايتارلىقتاي قولداۋ. ۇلتتىق ستاتيستيكا بيۋروسىنىڭ دەرەگىنشە، قازاقستانداعى جەڭىل كولىكتەردىڭ شامامەن 67%-ى 10 جىلدان اسا ۋاقىتتان بەرى قولدانىلىپ كەلەدى، ال ولاردىڭ 41،5%-ى 20 جىلدان اسقان.

كولىك ساناتى ناقتى ايقىندالادى

بۇرىن كولىكتەردى دجيپ، پيكاپ، فۋرگون سەكىلدى تيپتەرگە ءبولۋ كەزىندە داۋ تۋىندايتىن. ەندى بۇل نورما الىپ تاستالدى. كولىك سالىعى تەك تەحنيكالىق ءتولقۇجاتتا كورسەتىلگەن سانات بويىنشا ەسەپتەلەدى (A، B، C، D). 

3 ليتردەن اساتىن قوزعالتقىشتارعا ۇستەمە سالىق جويىلدى

بۇرىن قوزعالتقىش كولەمى 3000 كۋب سم-دەن اساتىن، 2013 جىلدان كەيىن شىعارىلعان كولىكتەرگە جوعارى سالىق سالىناتىن. 2026 جىلدان باستاپ بۇل تالاپ الىپ تاستالادى.

ەندى بارلىق جەڭىل كولىك ءبىرىڭعاي شكالا بويىنشا سالىق تولەيدى.

اۋىل شارۋاشىلىعى ءونىمىن وندىرۋشىلەرگە جەڭىلدىك ساقتالادى

ءاربىر شارۋا نەمەسە فەرمەر قوجالىعىنا تيەسىلى ءبىر كولىك كولىك سالىعىنان تولىق بوساتىلادى (تالاپتارعا ساي بولعان جاعدايدا).

• ەگەر ءبىر عانا پيكاپ بولسا، سالىق تولەنبەيدى؛

• بىرنەشە كولىك بولسا، جەڭىلدىك تەك بىرەۋىنە قولدانىلادى.

قىمبات كولىكتەرگە 10% اكسيز ەنگىزىلەدى

2026 جىلعى 1 قاڭتاردان باستاپ قۇنى 18 000 اەك-تەن (شامامەن 77 ملن تەڭگە) اساتىن جەڭىل كولىكتەرگە 10% اكسيز سالىنادى. بۇل تالاپ كولىكتى العاش تىركەۋ كەزىندە دە، كەيىن قايتا ساتۋ بارىسىندا دا قولدانىلادى.

زاڭدى تۇلعالارعا ەسەپ جەڭىلدەتىلدى

كومپانيالار ەندى كولىك سالىعى بويىنشا توقسان سايىن ەسەپ تاپسىرمايدى. تەك جىلدىق دەكلاراسيا جەتكىلىكتى.

قاشان كۇشىنە ەنەدى؟

• جاڭا ءتارتىپ 2026 جىلعا قاتىستى، ياعني تولەمدەر 2027 جىلى جۇرگىزىلەدى.