Биылдан бастап SCAT әуе компаниясы Шымкент – Үрімші бағыты бойынша тікелей рейстерді іске қосады. Жаңа әуе бағыты Қытайға сапарды бұрынғыдан да қолжетімді әрі ыңғайлы етпек, деп хабарлайды Dalanews.kz.
Компанияның мәліметінше, рейстер аптасына екі рет – сейсенбі және жұма күндері орындалады. Ал кері бағыттағы ұшақтар сәрсенбі және сенбі күндері ұшады. Ұзақтығы – небәрі 2 сағат 20 минут.
Үрімшіге қандай мақсатта баруға болады?
Бұл қала - Қытайдың Шыңжаң-Ұйғыр автономиялық ауданындағы сауда, мәдениет және бизнес орталығы. Мұнда заманауи технологиялар мен Шығыстың дәстүрлі мәдениеті үйлесім тапқан. Сауда орындарындағы түрлі-түсті дәмдеуіштер, жібек мата, тіл үйірер ұйғыр тағамдары... Және де әлемге аты әйгілі базар қатарларынан басқа да қажеттінің бәрін табасыз.
Үрімшінің табиғаты да ерекше. Мәселен, Тянь-Шань таулары, әсем Тяньчи көлі және көптеген табиғи қорықтарына табан тіреп, таза ауасымен тыныстап қайтуыңызға болады.
Қала ішінде де көрікті жерлері жетіп артылады. Шыңжаңның басты мұражайы - оның экспонаттарының арасында 3000-4000 жылдық мумиялар, соның ішінде әйгілі "Лоулан сұлуы", Ұлы Жібек жолының Жібек артефактілері, будда фрескалары, мүсіндер және т.б. бірегей жәдігерлер бар.
Үлкен алаңы бар әсем Қызыл төбе - мегаполистің ең тартымды орны. Цзефан ауданындағы орталық көшелерде серуендеп, көптеген жайлы кафелер, мейрамханалар мен дүкендерді аралауға болады.
Билеттер scat.kz. сайтында, SCAT мобильді қосымшасында және басқа да сату платформаларында қолжетімді.
