Қазақстанда кәсіпорындардың жалақы бойынша 1,1 мыңнан астам жұмысшының алдында берешегі бар. Бұл туралы Еңбек және әлеуметтік қорғау министрлігі хабарлады, деп жазады Dalanews.kz.
"2025 жылғы 1 ақпандағы жағдай бойынша мемлекеттік еңбек инспекторлары республиканың 16 кәсіпорнында 1,1 мыңнан астам жұмыскерге 318,2 млн теңгеге жалақы бойынша берешек екенін анықтады. Сонымен бірге түрлі ұйымдарда жүргізілген тексерулер барысында 499 еңбек құқығының бұзылуы анықталды", делінген бүгінгі министрлік хабарламасында.
Еңбек министрлігі жалақы бойынша берешегі бар кәсіпорындардың басшыларына орындауға міндетті 240 ұйғарым беріліп, 24,3 млн теңгеден астам сомаға айыппұл салынғанын нақтылайды.
"Қабылданған шаралардың, оның ішінде жалақы бойынша берешекті өтеудің қатаң кестелері мен мерзімдерін белгілеудің нәтижесінде 890 жұмыскердің құқықтары қорғалды. Оларға 81,3 млн теңге төленді",- дейді ведомстводағылар.
Бұдан басқа, еңбек заңнамасының сақталуына мемлекеттік бақылауды қамтамасыз ету мәселелері ҚР Еңбек және халықты әлеуметтік қорғау министрлігінің ерекше бақылауында.
2025 жылғы 1 ақпандағы деректер бойынша, мемлекеттік еңбек инспекторлары 389 тексеру жүргізді, оның барысында 499 бұзушылық анықталды, оның ішінде:
- еңбек саласында – 466;
- еңбек қауіпсіздігі және еңбекті қорғау бойынша – 31;
- халықты жұмыспен қамту бойынша – 2.
Қабылданған шаралардың нәтижесінде 3,8 мың жұмыскердің еңбек құқығы қорғалды.
Бұған дейін сайтымызда: "Орташа жалқыдан алты есе жоғары. Шенеуніктердің қанша жалақы алатыны белгілі болды" деген мақала жарияланған болатын. Сондай-ақ "Елімізде 296 кәсіпорынның жұмысшылары алдындағы қарызы 4,5 млрд теңгені құрайды" деген материалды бізден оқи аласыздар.