قازاقستاندا كاسىپورىنداردىڭ جالاقى بويىنشا 1،1 مىڭنان استام جۇمىسشىنىڭ الدىندا بەرەشەگى بار. بۇل تۋرالى ەڭبەك جانە الەۋمەتتىك قورعاۋ مينيسترلىگى حابارلادى، دەپ جازادى Dalanews.kz.
"2025 جىلعى 1 اقپانداعى جاعداي بويىنشا مەملەكەتتىك ەڭبەك ينسپەكتورلارى رەسپۋبليكانىڭ 16 كاسىپورنىندا 1،1 مىڭنان استام جۇمىسكەرگە 318،2 ملن تەڭگەگە جالاقى بويىنشا بەرەشەك ەكەنىن انىقتادى. سونىمەن بىرگە ءتۇرلى ۇيىمداردا جۇرگىزىلگەن تەكسەرۋلەر بارىسىندا 499 ەڭبەك قۇقىعىنىڭ بۇزىلۋى انىقتالدى"، دەلىنگەن بۇگىنگى مينيسترلىك حابارلاماسىندا.
ەڭبەك مينيسترلىگى جالاقى بويىنشا بەرەشەگى بار كاسىپورىنداردىڭ باسشىلارىنا ورىنداۋعا مىندەتتى 240 ۇيعارىم بەرىلىپ، 24،3 ملن تەڭگەدەن استام سوماعا ايىپپۇل سالىنعانىن ناقتىلايدى.
"قابىلدانعان شارالاردىڭ، ونىڭ ىشىندە جالاقى بويىنشا بەرەشەكتى وتەۋدىڭ قاتاڭ كەستەلەرى مەن مەرزىمدەرىن بەلگىلەۋدىڭ ناتيجەسىندە 890 جۇمىسكەردىڭ قۇقىقتارى قورعالدى. ولارعا 81،3 ملن تەڭگە تولەندى"،- دەيدى ۆەدومستۆوداعىلار.
بۇدان باسقا، ەڭبەك زاڭناماسىنىڭ ساقتالۋىنا مەملەكەتتىك باقىلاۋدى قامتاماسىز ەتۋ ماسەلەلەرى ق ر ەڭبەك جانە حالىقتى الەۋمەتتىك قورعاۋ مينيسترلىگىنىڭ ەرەكشە باقىلاۋىندا.
2025 جىلعى 1 اقپانداعى دەرەكتەر بويىنشا، مەملەكەتتىك ەڭبەك ينسپەكتورلارى 389 تەكسەرۋ جۇرگىزدى، ونىڭ بارىسىندا 499 بۇزۋشىلىق انىقتالدى، ونىڭ ىشىندە:
- ەڭبەك سالاسىندا – 466؛
- ەڭبەك قاۋىپسىزدىگى جانە ەڭبەكتى قورعاۋ بويىنشا – 31؛
- حالىقتى جۇمىسپەن قامتۋ بويىنشا – 2.
قابىلدانعان شارالاردىڭ ناتيجەسىندە 3،8 مىڭ جۇمىسكەردىڭ ەڭبەك قۇقىعى قورعالدى.
بۇعان دەيىن سايتىمىزدا: "ورتاشا جالقىدان التى ەسە جوعارى. شەنەۋنىكتەردىڭ قانشا جالاقى الاتىنى بەلگىلى بولدى" دەگەن ماقالا جاريالانعان بولاتىن. سونداي-اق "ەلىمىزدە 296 كاسىپورىننىڭ جۇمىسشىلارى الدىنداعى قارىزى 4،5 ملرد تەڭگەنى قۇرايدى" دەگەن ماتەريالدى بىزدەن وقي الاسىزدار.
