Қазақстанда тіркелген жеке кәсіпкерлердің саны бір жыл ішінде айтарлықтай қысқарды, деп хабарлайды dalanews.kz.
Ұлттық статистика бюросының деректеріне сәйкес, 2026 жылғы 1 маусымдағы жағдай бойынша елде шамамен 1,66 миллион жеке кәсіпкер тіркелген. Бұл өткен жылдың сәйкес кезеңімен салыстырғанда 9,7 пайызға аз.
Сонымен қатар жұмыс істеп тұрған жеке кәсіпкерлер саны да төмендеген. Статистика бойынша, белсенді ИП-лердің қатары бір жылда 8,5 пайызға қысқарған.
Сарапшылар мұны кәсіпкерліктің жаппай жабылуымен ғана байланыстырмайды. Олардың пікірінше, кәсіпкерлердің бір бөлігі жаңа арнайы салық режиміне өтіп, өзін-өзі жұмыспен қамтығандар санатына ауысқан болуы мүмкін. Мұндай жағдайда олар жеке кәсіпкер ретінде статистикалық есептен шығады.
Дегенмен көрсеткіштердің төмендеуі шағын және орта бизнес секторындағы үрдістерге қатысты сұрақтарды күшейтіп отыр. Әсіресе салықтық өзгерістерден кейін кәсіпкерлердің қаншасы қызметін тоқтатқаны және қаншасы өз мәртебесін өзгерткені алдағы кезеңде маңызды көрсеткіштердің бірі болмақ.
Айта кетейік, соңғы жылдары Қазақстанда салықтық әкімшілендіруді жетілдіру және кәсіпкерлік субъектілерін қайта тіркеу бағытында бірқатар өзгерістер енгізілген.
